Højskole millionilikkaanik tunissutisivoq

Nunatsinni højskolit pisoqaanersaat Knud Rasmussenip Højskolia ukiormanna ukiunik 50-nngortorsiussaaq, højskolili taanna pisoqaliarsaalersoq iluarsaanneqartariaqalivissimavoq.

Taamaattumik siulersuisut siulittaasuat Adam Olsen, allamut atatillugu nunani avannarlerni angalasoq, aamma højskolep pisortaa Johanne Olsen Danmarkimiipput tunissutit millionilikkaanik nalillit tigujartorlugit.

Tunissuteqartut tassaapput  A.P. Møller og Hustru Chastine McKinney Møllers Fond til almene Formål, 5 millioner koruuninik tunissuteqartoq aamma Augustinus Fonden 2 millioner koruuninik tunissuteqartoq.

- Allaffimmiuttaa højskolillu pisortaata sulilluarnerisigut taamatut tunissuteqarfigineqarnerput pisinnaanngorsimavoq, Adam Olsen Københavnimiit KNR-imut oqaluttuarpoq.

Igaffik pisariaqarteqisaminik iluarsaanneqassaaq. Kiassaateqarfik aamma iluarsaanneqassaaq siunissaq ungasinnerusoq isigalugu aningaasartuutikinnerulernermik kinguneqartussamik.

Taamaakkaluartoq højskoli suli iluarsaanneqarnissamik pisariaqartitsivoq.

- Naatsorsuinivut naapertorlugit 30-40 millioner koruunit naligannut iluarsaanneqarnissamik pisariaqartitsisoqarpoq, Adam Olsen nassuiaavoq.

- Taaneqareersutut højskole ukiunik 50-liilerpoq. Igalaat ineeqqallu iluarsaanneqartariaqalivissimapput, Adam Olsen oqarpoq.

Højskolip pisortatigoortumik nalliuttorsiornissaa aasamut juulip pingajuat pissaaq.