Ilinniarnertuunngorniartut marluugaangata aappaa unitsitsiinnartarpoq. Tamannali Nuummi GUX-ip iliuuseqarfiginiarpaa.

GUX Nuummi unitsitsiinnartarneq akiorniarpaat

Ilinniarnertuunngorniarfimmi ilinniartut marluugaangata aappaa taamaatiinnartarmat politikkerinut, rektorinut, ilinniarnertuunngorniarfimmi ilinniartitsisunut ilinniartunullumi isumakuluuttaanngitsuunngilaq. Soorli unitsitsiinnartoqarnersoq paasiniarlugu Nuummi ilinniarnertuunngorniarfimmi rektor misissuititsivoq.

 - Nunatsinni ilinniarnertuunngorniarfinni unitsitsiinnartarnerup peqqutaa ilisimasaqarfigivallaarunanngilarput.

Nuummi ilinniarnertuunngorniarfimmi rektori Mikael Engaard oqarpoq. Taassuma sociologimik Naja Skadhauge Sanomik unitsitsiinnartarnerup peqqutaa  paasiniarniarlugu misissuititsinera siorna saqqummiunneqartoq ”Tunniutiinnaqqinnianngilanga” qulerutalik aallartitaraa. 

AAMMA ATUARUK Ilinniarnertuunngorniat uniinnartarnerat misissuiffigaat

Misissuititsinerulli takutippaa unitsitsiinnartarneq arlalinnik peqquteqartoq, Mikael Enggaardilu arlalinnik inassuteqarpoq.

- Oqartoqarsinnaavoq aqqutit marluk atorlugit sulilertugut. Siullertut ilitsersuineq aappattullu suliamut pulammasimassusermut tunngasoq, Mikael Engaard oqarpoq, ilitsersuinermut tunngatillugu ilinniartut najugaqarfianni sulisut ilaneqarput, psykoterapeutimik atorfinitsitsinermik najugaqarfinnilu amerlanrusunik sulisusoqalerluni.

Taamatullu siunnersortit pilersaarusiugaanerusumik suleriuseqalerneratigut, ingammik ilinniarnertuunngorniarfimmiit ingerlariaqqittussanut, taakku ilinniagaqaqqinnissaat angorusullugu.

AAMMA ATUARUK Taamaatiinnartoqartaraluartoq nasartaartut amerliartorput

Suleqatigiilluarnermut sugiusarneqarput

Suliamut pulammasinnaanerunissamut tunngatillugu Nuummi ilinniarnertuunngorniarfimmi ilinniartut ilinniagassereqatigiissinnaanerannik periarfissinneqarput, qallunaatut kisitsisinermilu immikkut ittumik allattarissanik sungiusartarlutik.

Taakku saniatigut Nuummi ilinniarnertuunngorniarfimmi allamik pingaartitaqarlutik aamma tikkuagaqarput:

- Unitsitsiinnartarnermik misissuinermi takusinnaavarput aamma ilinniartut atuarnerminni atuarfimmeeqatigiinnerminnilu  ataatsimooriaasiat apeqqutaasoq.

Mikael Enggaardip ilanngullugu oqaatigaa ilinniarnertuunngorniarfimmi ilinnialerlaat ilinniarnermi siunnersortimik pulaartoqarnerminni suleqatigiissinnaanermut sungiusartinneqartut, atuarfiullu sammisassanik amerlanerusunik neqerooruteqartoq taavalu ilinniartitsisut atuartitsinissaminnut atuartunut piffissamik atuinerulerlutik.

Misissuinerup inernerata saqqummiunneraniit ukioq ataaseq sinnilaarpaa. Suliniutilli sunniuteqarpat?

- Arriikkaluamik ilorraap tungaanut ingerlavugut, ajornartorsiutimmi ullormiit ullormut aaqqiissinnanngilagut, siumulli ingerlasorujoorpugut, Mikael Engaard oqarpoq.
 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat