GUX-imi ilinniartut takorluukkatik malikkusuppaat akissarsiaqqortunissarli aamma pilerinaralugu
Saqqummersitsineq aallarnerneqarmat, Nuummi GU-p inersuaa ilinniartunik, siunissaminnut aalajangiinissaminnut piareersimasunik, suliffeqarfinneersunillu ilinniartunik siunnersuiartortunik ulikkaarpoq.
Ilinniartut ilaat ilinniarnertuunngorniarfimmi naammassigunik sumi ilinniaqqissanerlutik aalajangereerpaat, ilaallu assigiinngitsunik ilinniagallit akissarsiaat agguaqatigiissillugit ukiumut assigiinngissutaat eqqarsarnartoqartippaat.
Pilu Chemnitz taakkununnga ilaavoq. Taanna ilinniarnertuunngorniarfimmit naammassiguni ingellaqqilluni ilinniarusuppoq.
- Inuunermi periarfissarpassuaqalernikuuvoq. Aningaasallu ullumi inooriaasitsinnut pingaartorujussuupput. Periarfissaqarnerujussuusoqartarpoq pisariaqartitanullu akissaqaraanni pitsaanerusumik inuusoqarsinnaalluni, Nuummi GUX-imi oqaatsinik sammisaqarluni ukiut pingajussaannik ilinniartoq, Pilu Chemnitz oqarpoq. Taanna ilinniarnertuunngorniarfimmit allagartartaaruni ukioq ataaseq atuanngeriarluni tarnip pissusaanik immikkut ilinniagaqarusuppoq.
Akissarsiaqqortunissaq pilerinaraluarluni sunngorniarnermik takorluukkat ilinniakkamik suliffimmillu toqqaanermi pingaarnerpaasut ilinniartut allat isumaqarput.
- Videregående uddannelse qiviarlugu qaffasittorujussuusoq aamma annertoorujuusoq takullugu pilerinaraluarluni kisiannili uanga allaanerulaanik sinnattoqarlunga, ukiumi siullermi ilinniartoq Karl-Frederik Olsen KNR-imut oqarpoq.
Ukiup aappassaanik ilinniartoq Karla Abelsen taamatuttaaq isumaqarpoq.
- Eqqarsariaallalaarpunga kisianni uanga sinnattukka malikkusukkakkit ajorinngilakka. Taamaattussatut isigigakkit,
allaffimmiutut perorsaasutullu ilinniaqqikkusuttoq, Karla Abelsen KNR-imut taama oqarpoq.