Guultisiorfimmi mingutsitsipput

Nalunami guultisiorfik avatangiisimik mingutsitsivoq. Qaammatini arfineq pingasuni guultisiorfik ammareersorlu, Danmarkimi avatangiisit pillugit ilisimatuut misissuisimanerminni paasivaat Nalunami mingutsitsisoqartoq.

Misissuinermi paasineqarpoq nunamik mingutsitsinermi grundstoffi, tassa nunami pinngoqqaatit akui marloriaammiit quleriaammut akui qaffariarsimasut. Mingutsitsineq 5 kilomiiteriniit 10 kilomiiterit tungaanut isorartutigivoq. DMU-p naliliinermini oqarpoq mingutsitsineq annertuallaanngitsoq, ukiulli tamaasa mingutsitsinerup ineriartornera DMU-p malinnaaffigissavaa.

Mingutsitsinerusoqalissagaluarpat Namminersornerullutik oqartussat iliuuseqarniarput.

Nalunami qaarusummi piiaaffimmit pujoralaat aniasartut siaruartannginnissaat DMU-mit anguniaqquneqarpoq, tamannalu Namminersornerullutik oqartussat guultisiorfiullu eqqartortariaqaraat DMU siunnersuivoq.

Nalunami mingutsitsineq Marmorilimmi Ivittuuni Mestersvigimilu mingutsitsinernit annikinneruvoq.