GUp ilinniartut nakkutigeqqissaalerpai

Atuartoq atuarnerup nalaani sinikkuni imaluunniit nittartakkami atuarnermut attuumassuteqanngitsumiikkuni, atuartitsinermut peqataanngitsutut ilinniartitsisup aalajangiiffigisinnaavaa nalilerluguluunniit. Taannalu malittarisassaq Qeqqani Ilinniarnertuunngorniat nuannaarutiginngilluinnarpaat.

- Nuannaarutiginngilaat, atuarnermut peqataallutik peqanngitsutut nalunaarsorneqaramik, atuartut amerlanerit taama isumaqarput. Atuartut siunnersuisoqatigiivini siullittaasoq, Maasi Brøns Chemnitz oqarpoq.

Ilinniarnertuunngorniarfik siornatigut annertunerpaamik procentinik 15-inik peqannginnissamut periarfissiisaraluarpoq, taannalu atorunnaarsillugu peqanngnneq akuersaarneqarsinnaajunnaarsinneqarpoq.

- Tassa imaappoq, peqanngissimagaanni napparsimanermik, nakorsiarnermik assigisaanillu uppernarsarsinnaanagulu mianersoqqussummik ingerlaannaq tunisittoqarsinnaavoq, Maasi Brøns Chemnitz nassuiaavoq.

Taassumalu oqaatigaa, malittarisassaq ilinniarnertuunngornianit akuersaarneqanngilluinnartoq.

- Siornatigut periarfissarineqartoq ukiumut atuarnerup 15 procentiinik peqanngissinnaaneq utertinneqarusuppoq, inortuinissamut aamma periarfissaqartoqartariaqarmat, Maasi Brøns Chemnitz oqarpoq.

Malittarisassat nutaat pissutigalugit ajortoortoqavissinnaavoq, assersuutigalugu atuartoq ilinniarnertuunngorniarfimmi namminerisaminik ilinniartuuppat, Maasi Brøns taama isumaqarpoq.

Tamannalu pillugu ulloqeqqaanerani Radioaviisimi tusagaqarsinnaavutit, tassanilu rektori Gitte Hertling oqaloqatigineqassaaq.