Guitarertartorsuaq toqukkut qimaguppoq
Les Paul, guitarillaqqissorsuaq, aamma nunarsuarmi tusaamasamik, nammineq aterminik taagorneqalersumik, guitarimik ilusilersuisoq, 94-inik ukioqarluni ippassaq unnukkut toquvoq.
Allattoq Elisa Isaksen
Les Paul, puammigut aseruuttoornermigut New Yorkimi napparsimmavimmi toqusoq, Gibsonip, guitarimik ilisimaneqarluartumik Les Paulimik tunisassiortuusup, oqaatigaa.
Les Paul, kinguaariinnut rockimik nuannarisalinnut, 1960-ikkunni peroriartortunut, pingaarutilerujussuuvoq. Guitari ilusilersugaa iluserilluinnartuuvoq, guitaritullu Fenderitut siaruarsimatigaluni.
Rockimik nipilersortartorsuit, ilaatigut Eric Claptonip aamma Steve Millerip, Les Paulip guitariliaa ataqqinarsisippaat.
Les Paul, jazzimik guitarertartutut 1930-kkunni tusaamasaanermi nalaani guitari kingusinnerusukkut tusaamasaalersoq ilusilersorpaa.