Guantanamup matunissaanut itigartitsipput

Guantanamo matuneqarpat tigusat sumut inissinneqassappat? Obamap parteeqataasa matusinissaq akerlerilerpaat. Neriorsuineq piviusunngortitsisinnaanerlu assigiinngillat. Maannakkorpiaq USAp præsidentia Obama neriorsuisimanerminit pisarineqartutut ippoq. Jannuaarimi præsidentip illorsuanut nuukkami neriorsuutigisaata siullersaraat.

Amerikkamiut Guantanamomi parnaarussivissuaqarnerat nunarsuarmioqatigiinnit iluarineqanngeqaaq. Jannuaarimili Obamap oqalugiareernerata kingorna pattaannerit soorluuna siusippallaarsimasut. Guantanamomi matuneqarpat tigusat sumut inissinneqassappat? USAmimi tigusat kikkunnit tamanit akisussaaffigineqarumanngillat.

Obamap parteeqataanit allaat Guantanamop matuneqarnissaa akerlerineqalerpoq. Illuatungiliuttut assatik tagiartuuppaat; kiisami Obama parteeqataalu assortuutileqimmata. Inatsisartut arlaasa Kongressip Guantanamomik matusinissamik siunnersuut ippassaq præsidentiminnut utertippaat.

Præsidentinngorniuttoqarmat Obamap unammillertaata John McCainip ima oqaatigaa:

- Amerikkami innuttaasut pilersaarutinik nassuiaasersorluakkanik nalunaarfigineqartariaqarput.