GTE: Kangerlussuarmi mittarfik inerisarneqartariaqarpoq
Kangerlussuarmi mittarfiup tallineqarnissaa nutarterneqarnissaalu Nunatsinni Takornariaqarnermi Inuussutissarsiornermilu Siunnersuisoqatigiinnit aamma tapersersorneqalerpoq.
Kangerlussuup mittarfiata inerisarneqarnissaa pisariaqarluinnartoq, Air Greenlandip pisortaanerata Michael Binzerip sapaatip-akunnerata massuma aallartilaarnerani oqaatigereerpaa.
Kangerlussuarmi mittarfik inerisarneqanngippat takornariaqartitsineq innarlerneqarsinnaasoq, Nunatsinni Takornariaqarnermi Inuussutissarsionermilu Siunnersuisoqatigiinni pisortaaneq Thomas Rosenkrands Sermitsiamut oqarpoq:
- Mittarfik mikivallaarpoq. Tamanna takornariaqarnerpaaffiup nalaani malugisarparput. Pissutsit taamaaginnassappata takornariat iluamik sullinneqarsinnaanavianngillat. Nunani allani sullissinerit nunatsinnut naleqqiullugit pitsaanerusarput, takornariallu tamanna nalunngilaat, Thomas Rosenkrands Sermitsiamut oqarpoq.