GSS U-18-kkullu pissartanngorniutissapput
Naammassiartulerneranilu arsarnerit pissanganavissut ulluni kingullerni ingerlanneqarput.
GSS-ip ippassaq Nûk 23-21-imik ajugaaffigaa, unamminermi assut pissanganartumi.
GSS-p arsartartuini Nivi Berthelsen arfineq-marlunnik isertitsinermigut ajuunnerpaavoq, Andrea Andreassen tallimanik isertitsisoq.
Nûk-p arsartartuini Karen Marie Kyed Meyer arfinilinnik isertitsivoq Gerdaaraq Ingemannilu sisamanik isertitsilluni.
Kâgssagssuk-p U-18-illu nunanut allanut arsartartuisa unammineranni aallaqqaammulli nalunanngereersimavoq kikkut ajugaassanersut, tassaappullu U-18-ikkut 47-15-imik ajugaasut.
Kâgssagssuk-kunni Pipaluk Noahsen tallimanik isertitsivoq Mari Berthelsen sisamanik. U18-ikkunni Naasu Tremel qulingiluanik isertitsisoq Hanna Millek Line Thomsenilu tamarmik immikkut arfinilinnik isertitaqarput.
Inussivimmi massakkorpiaq pingasunut U18-ikkut Nuffik-mmut unammipput, nalunaaqutaq 16.30 tallimat qeqqa GSS Kâgssagssuk-llu assammik arsarlutik unammissasut.
Ullumili unamminerit finalertussat kikkuunerannut sunniuteqassanngillat, pissartanngorniuttussat tassaassammata GSS aamma U-18 nunanut allanut unammisartui, ”Faxe Cup-imi 2007-mi pissartanngorniuttussat”.
Bronzennanniutissapput NÛK Nuffik-llu. Unamminerit marluk taakku aqagu sapaammi Nuup Timersortarfissuani ualikkut pingasuniit aallartissapput, KNR TV-kkut toqqaannartumik aallakaatinneqassallutik.