GSS pissartaavoq
Arnat aamma angutit inersimasut assammik arsarlutik pissartanngorniunneranni ippassaq naammassisumi - soorlu siorna pisutut - GSS Nuummeersoq arnani angutinilu pissartanngorpoq.
Allattoq Elisa Isaksen
GSS-ip arnartaasa pissartanngorniutivilluni unamminerminni naligiiffioqisumi, nikinnermi Nûk målimik ataatsimik siuarsimareersorlu 20-17-mik ajugaaffigaat.
Angutinili kikkut pissartanngussanersut nalorninarsimanngilaq.
Pissartanngorniutivinnermi GSS-ip N48 Ilulissaneersoq, nikinnermi 20-12-imik siuarsimareerluni 39-28-mik ajugaaffigaa.
Bornzinnanniulluni unamminerni arnani Sisimiormiut SAK-meersut aamma N48 Ilulissaneersut unammineranni, SAK 47-19-imik ajugaavoq, angutinilu Nûk SAK-mut unamminerminni 23-18-imik ajugaalluni bronzinnappoq.