Aalborg, Esbjerg immaqaluunniit Århus.
Grønlandshavnip sumi inissinnissaa sapaatip akunnerani uani aalajangerneqassagunarpoq.
Suliariumannittussarsiuussineq naammassereerpoq, neqeroorutit misissoqqissaarneqareerput Naalakkersuisullu aalajangiinissaat tullinnguuppoq.Århusip umiarsualiviata naalagaa, Knud Erik Møller:
- Qanoq inerneqarnissaa pissanngatigisorujussuuvarput. Neriuppugut politikerit aalajangiiniarnerminni silatusaarluassasut.
Nioqqutissat 300.000 tonsit Grønlandshavnimut siorna tikiunneqarput, tassalu Grønlandshavneqarfiugaanni millioni koruunerpassuarnik naleqarpoq. Illoqarfiit umiarsualiveqarfiorusuttut pingasut nuannarineqalerniarlutik sinniisuutitaminnik Nunatsinnut aasaq angalatitsipput.
- Suliassaq pingaarutilerujussuuvoq, inernissaalu pissanngatigeqaarput, Esbjergimi umiarsualiviup pisortaa, Ole Ingrish oqarpoq.
Naalakkersuisut aqagu ataatsimiippata Grønlandshavnip sumiinnissaa aalajangerneqassagunarpoq.