Grønlandshavneqarfissaq ullumi aalajangerneqassaaq

Aalborg, Esbjerg Århusiluunniit. Grønlandshavnip sumiinnissaa Naalakkersuisut ullumi ataatsimiilerunik ulluniluunniit tullerni aalajangissagunavippaat.

Suliariumannittussarsiuussineq aasaq naammassivoq, neqeroorutillu misissoqqissaarneqareerput.

Illoqarfiit umiarsualiveqarfiorusuttut pingasut Aalborg, Esbjerg Århusilu sinniisuutitaminnik Kalaallit Nunaannut aasaq angalatitsipput.

Nioqqutissat katillugit 300.000 tonsit Grønlandshavnikkoorunneqarput, koruuninik millionerpassuarnik naleqartut. Naalakkersuisut aalajangiinissaat tullinnguuppoq.

Nalunanngilarlu inernissaa pissanngatigineqaqisoq.

- Neriuppugut politikerit aalajangiiniarnerminni silatusaarluassasut, Århusip umiarsualiviani pisortaq Knud Erik Møller oqarpoq.

- Suliassaq pingaarutilerujussuuvoq, inernissaalu pissanngatigeqaarput, Esbjergimi umiarsualiviup pisortaa, Ole Ingrish oqarpoq.

Grønlandshavni Aalborgimi ullumikkut inissisimavoq.