Grønlandsbanki Aasianni immikkoortortaqarfeqalissaaq
Immikkoortortaqarfik siunnersortinik arfinilinnik marlukkaarlutik paarlakaajaattunik sulisoqassaaq. Appaaraq aningaaserivittaqanngilaq, taamaattumik aningaasanik sullissineq Pilersuisumit aqunneqaannassaaq.
- Taamatut aaqqissuussineq misiliutaavoq, taamaattumik mianersortumik aallartippugut, upperaarpulli piffissap ingerlanerani ingerlalluarumaartoq. Soorunami misiliinitsinni paasisavut atorumaarpavut, ilikkakkavut ilinniutigalugit. Misiliinerput toqqammavissaqartoq takusinnaagutsigu, piareeqqavugut annertunerusumik iliuseqarnissatsinnut. 2012-mi aamma 2013-mi misiliineq ingerlanneqassaaq, Atuisunut pisortaq Peter Petersen oqarpoq.
Aasianni misiliineq amerlasuunik peqquteqartoq oqaatigaa.
- Kalaallit Nunaanni illoqarfiit annersaasa tallimaraat, Avannaani qitiusumik ilinniartoqarfiuvoq, uuliasiorniarnermi aallartisarfiuvoq kiisalu sullitatsinniit ukiorpassuarni kissaatigineqartarnikuulluni, Peter Petersen oqarpoq.
Grønlandsbanki Nuummi, Ilulissani, Sisimiuni, Qaqortumi Maniitsumilu immikkoortortaqarpoq.