GrønlandsBankenip sullitai amerliartuinnarput
GrønlandsBanken ukiup affaani siullermi naatsorsuutaani ullumi saqqummiunneqartuni erserpoq, akileraarutip akilinnginnerani 52,7 millionit koruuninik sinneqartoortoq. Siorna ukiup affaanut siullermut GrønlandsBanken 42,5 millionit koruuninik sinneqartoorpoq.
- Ukiup affaani siullermi aningaasat atortitavut amerlisimapput, naak akitsuusiisarneq appasissoq aningaasartuutingigaluarlutigu inernerit kusarput, GrønlandsBankenip pisortaanera Martin Kviesgaard oqarpoq.
Aningaasanik atortitsinerminni annaasat ikittuinnat annaaneri Martin Kviesgaardip nuannaarutigaa. Inuinnaat aamma suliffeqarfiutillit aningaaserivimmik atuisut ataatsimut isigalugu aningaasarissaarput, naak aningaasarliornermik ingerlanerliortoqaraluartoq, aningaaseriviup pisortaa isumaqarpoq:
- Taamaattorli takusinnaavarput, suliffeqarfeeqqat mikisunillu aalisariutaatillit artorsarnerulersimasut, Martin Kviesgaard oqarpoq.
Ukiup affaani siullermi GrønlandsBankenip atukkiussai 113,6 millionit koruuninik amerleriarsimapput. Martin Kviesgaardip oqarnera naapertorlugu tamanna pisinnaasimavoq, aningaaserivinnik allanik atuisut GrønlandsBankenimut nuutsinniarneri iluatsissimammat.
