Grønlandsbanken siorna angusarissaarpoq
Grønlandsbankip ukiumoortumik naatsorsuutaani takuneqarsinnaavoq akileraarutit peernagit 100 millionit koruuningajannik aningaaserivik sinneqartoortoq. Sinneqartoorutit 2008-mut sanilliullugit 28 millionit koruunit sinnilaarlugit amerlanerupput. Aningaaserivimmi pisortaaneq isumaqarpoq, aningaasaqarnikkut ajornartorsiorneq eqqarsaatigissagaanni tamanna ajunngeqisoq.
- Sullitavut aningaasanik silappaarissumik atuipput, aamma ilaqutariit, imaluunniit suliffeqarfiit, aningaasaqarnerat aalaakkaasoq, kisitsisit takutippaat. Tassa oqarsinnaavugut piffissami eqqissinanngitsumi Kalaallit Nunaanni najugaqarluni iluartoq, sulisartuugaanni, suliffiuteqaraanni aningaaserivimmiittuugaanniluunniit, Grønlandsbankimi pisortaaneq, Martin Kviesgaard, oqarpoq.
Aningaasaqarnikkut ajornartorsiorneq Grønlandsbankip naatsorsuutaanut suli sunniuteqanngikkaluartoq, imaanngilaq Kalaallit Nunaat eqqorneqanngitsoq.
- Aningaasaqarnikkut ajornartorsiorneq Kalaallit Nunaannut annguppoq, kisianni nunarsuarmi allanut naleqqiullugu taama ajortiginngitsumik. Kalaallit Nunaata aningaasaqarnera suli aalaakkaavoq, Martin Kviesgaard erseqqissaavoq.
Grønlandsbanki angusarissaarnerpaagami 112 millionit koruuningajannik 2007-imi sinneqartoorpoq.
