GrønlandsBanken sinneqartuungaatsiarpoq

Illutaarnissamut, biilitaarnissamut angallatitaarnissamullu atorniarnerit. Tamakkuupput aningaaseriviup GrønlandsBANKEN-ip siorna sinneqartuungaatsiarneranut ilaatigut pissutaasut. Aningaaserivik ukiuni 40-ngajanni aatsaat taama angusaritsigaaq.

GrønlandsBANKEN-ip naatsorsuutaani ukioq 2006-imoortuni inernerit saqqummiuteqqammisat takutippaat, aningaaserivik akileraarutit peereerlugit 67 mio. 271 tusind koruuninik sinneqartoortoq, ukiup siulianit 11 millioni koruuninik amerlanerusunik.

Kisitsisit aamma takutippaat, isertitat taamaalillutik 32 procentimik qaffattut.

Aningaaseriviup pisortaa Martin Kviesgaard oqarpoq, siuariarneq ilaatigut aningaasanik atorniarnerit amerleriarnerisa kingunerigaa. Namminersortut suliffeqarfiillu sinerissami tamarmi katillugit 337 millioni koruuninik 2006-imi atorniarnerusimapput.

Illoqarfiit annerit, pingaartumik Nuuk, ineriartorfiunerpaajuarsimapput. Atorniarnerit amerlanersaat initaarnissamut, biilitaarnissamut angallatitaarnissamullu tunngasuullutik.

Suliffeqarfippassuit suliaminnik annertusaallutik atorniarsimanerat GrønlandsBANKEN-ip angusarissaarneranut peqqutaaqataavoq.

- Akit neqeroorutillu tungaatigut unammillersinnaassuseqarsimagatta taama angusaqarpugut, soorunami aamma sulisut sulilluarsimaqaat, Martin Kviesgaard oqarpoq.

Pappiarat nalillit niuerutaalluarsimapputtaaq. Taamaattumik aningaaseriviup naatsorsuutigaa angusarissaarnertik ukiormanna ingerlaannassasoq, allaallu 10 procentimik siornarnit pitsaanerussasoq.

GrønlandsBANKEN ukioq 2006-ip naanerani 95-inik sulisoqarpoq, arnat 68-it angutillu 27-t.

GrønlandsBANKEN-mik ilaatigut piginnittuupput Namminersornerullutik Oqartussat Nuna Fonden-ilu.