GrønlandsBANKEN sinneqartoorpoq

Aningaaserivik GrønlandsBANKEN akileraarutit peernagit 112 millioni koruuninik 2007-imi sinneqartoorpoq, taakku ukiumut siulianut naleqqiullugu 11 millioni koruuninik amerlanerullutik. Aningaaseriviup ukiumoortumik nalunaarusiaani ullumi saqqummiunneqartumi tamanna erserpoq.
februaarip 13-at 2008 17:18

Kalaallit Nunaanni aningaasaqarnerup ingerlalluarnera aningaaserivimmit nalilerneqarpoq. Aningaasarsiornikkut siuariartorneq 2004-mili ukiumut procentit marluk missaanni annertuseriartarsimavoq, taamaalilluni suliffissaaleqisut ikiliartorsimapput, akileraarutitigullu isertitat amerlisimallutik.

Inissialiortiternerit, aatsitassarsiornerup aamma takornarniaqarnerup siuariartornerat ingerlalluarnermut ilaatigut pissutaapput.

Illoqarfinnili anginerusuni siuariartortoqarneruvoq, pingaartumik Nuummi.

Siunissarli aningaaseriviup ernumanartoqartinneruaa. Raajat akii appariartorsimapput, raajalli akii appariartorunnaaraluarpataluunniit raajarniarnerup aningaasarsiutaanera appariartortuassaaq. Tamatumunnga pissutaavoq raajat pisarineqartartut amerlissagunanngimmata, raajarniarnerli pisariinnerulissaaq, taamaammat sulisut ikilisinneqarnissaat pisariaqalissalluni.

Aningaasarsiornerulli aaqqissuuteqqinnissaa suli pisariaqartinneqarpoq, suliffeqarfiillu imminut akilersinnaanngitsut qimattariaqarpavut, aningaaserivik naliliivoq, Kalaallit Nunaanniillu aallarartut amerleriarujussuarsimanerat GrønlandsBANK-ip aamma ernumanartoqartippaa.

Kalaallit Nunaanni aningaasarsiorneq ilippanaateqarluartoq aningaaseriviup nalilerpaa, ilinniartitaanerullu salliutinneqarnera tapersersorlugu.

Inunnik isumaginninnermut tunngassuteqartut unammillertaalluassapput. Pingaartumik illoqarfinni minnerni nunaqarfinnilu meeqqat siunissaat ilaasalu atugarisaat ajorluinnartuupput, aningaaserivik naliliivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq