GrønlandsBANKEN piareersarluarpoq

Aningaaseriviup GrønlandsBANKEN-ip utertoorneq iluanaarutigisussaanngikkaluarlugu kiffartuussinissaminut piareersarluarpoq.

Utertoornerup nalaa ukiunut siuliinut naleqqiullugu ulapaarfiutiginngitsoq aningaaserivimmi pisortap aamma oqaluttuaraa.

Inuit Akiliutiminnik Dankortiminnillu pisiniarfinni akiliisalernerisa kingorna immikkut karsiliisarneq GrønlandsBANKEN-imi atorneqarunnaarpoq.

- Ukiut arlallit matuma siorna utertoortut checkinik tunisittarput. Taakku aningaasanngortinniarlugit aningaaserivimmi inuit tattoqisaallutik utaqqerrattarput. Ukiumut isertitarisimasat immersorneqarnerini konto ilanngullugu immersorneqarsinnaalersillugu Aningaasaqarnermut Pisortaqarfik ukiut arlallit matuma siorna isumaqatigiissusiorfigaarput.

- Utertoortussat piareersarfigingaatsiarpavut: kommunimut paasiniaanitta saniatigut, inuit saaffiginnittut ukioq manna isertitarisimasatik aappagu immersulerunikkik, kontortik ilanngullugu immersorsinnaagaat ilisimatittarpavut, kiisalu saaffiginnittorpassuit kiffartuunnerisa saniatigut aningaasanik tigusisarfiit immertuartarniarpagut, GrønlandsBANKEN-imi pisortaq, Jesper Flensted, Jensen naggasiivoq.

Ukiumut isertitanik nalunaarsuinermi konto ilanngullugu nalunaarutigigaanni utertoorutissat sukkanerusumik pisarissersuutaannginnerusumillu tiguneqarsinnaapput.