GrønlandsBANKEN angusagissaarpoq
- Siorna aatsaat taama sinneqartooruteqartigaagut. Ukiulli tamaasa taamaattoqarsinnaanngilaq, pingaartumik piffissami Kalaallit Nunaata arriinnerusumik ingerlaffiani ukiormannalu siuariartortoqarnissaanut periarfissat killeqartillugt. Peqatigisaanilli akiliutit arlallit atorunnaarsippagut taarsigassarsisitsinerilluakiliutillu ilaannut akit appartillugit, tamannalu soorunami piffissaq qaninnerusoq eqqarsaatigalugu isertitat ikinnerunerannik kinguneqassaaq, taamaammat tunngaviusumik angusat attatiinnarsinnaasimagatsit iluarisimaarparput, Martin Kviesgaard oqarpoq.
Akileraarutit suli ilanngaatiginagit annikinnerusumik angusaqartoqarnera assigiinngitsunik peqquteqarpoq. Grønlandsbanken siorna piffissap taamaalinerani aningaasat nalingisa naleqqusarnerini kr. 3,5 mio.-nik sinneqartooruteqarpoq, maannali kr. 2,5 mio.-inik amigartooruteqarluni. Aningaaseriviup ingerlanneqarneranut aningaasartuutit aamma nikingarpianngillat, aningaaserivimmiititalli taarsigassarsiarititallu apparsimapput.
Aningaaseriviup taarsigassarsiarititanik nalikillisaaneri 2012-imi ukiup affaani siullermi kr. 6,4 mio.-iusut kr. 8,7 mio.-nut qaffassimapput. Naak qaffariaateqaraluartoq, nalikillisaanerit aningaaseriviup taarsigassarsiarititaasa qularnaveeqqusiinerisalu tamarmiusut 0,3%-eriinnarpaat.
- Angusavut Nunatsinni inuiaqatigiit, suliffeqarfiit innuttaasullu qanoq ingerlanerinut arlalitsigut takutitsisuupput. Taarsigassarsisitsinerit maannakkorpiaq appariartorput, tassuunalu takusinnaavarput ukiut siuliinut naleqqiullugu aningaasaqarnerup siuariartornera taannaajunnaarsimasoq. Aningaasaqarnikkut angusat appasinneruneri tupaallaatigineqanngillat, aalisakkanilli pisat ikinnerunerinut sanaartornerillu annertuut arlallit 2012-imi 2013-imi naammassineqarsimanerannut takussutissaannaalluni. Ukiup aallartinnerani tamanna siulittuutigereerparput, taamaammallu aamma naatsorsuutigereersimallutigu, taamatulli allangoriartortoqarnera soorunami pitsaanerusumut saannissaa kissaatigaarput, aningaaseriviup pisortaa oqarpoq.
Grønlandsbankenip 2013-imut naatsorsuutigisani attatiinnarpai, aningaasallu nalingisa naleqqussarneqannginnerini nalikilliliisoqannginneranilu 2012-imi kr. 141 mio.-nik sinneqartooruteqarnerminut naleqqiullugu kr. 125 - 145 mio.-nik sinneqartooruteqarnissani naatsorsuutigaa.