Grækenlandimi ilungersunartorsiornerup nunatsinni aningaaseriviit erniarititaat appartikkai

Eurommi nalorninartoqalerneratigut danskit koruuniat qularnaatsutut isigineqarluni atorneqalerpoq tamannalu Nunatsinni aningaaseriviit ernialiisarnerannik appartitsilluni.

- Tamanna innuttaasunut suliffeqarfinnullu aningaaserivimmit taarsigassarsiaqartunut pitsaasuuvoq. Assersuutigalugu inissianik piginnittut taarsigassarsiaminnik allanngortitsisinnaapput, Grønlandsbankip pisortaanera Martin Kviesgaard taama nassuiaavoq.

Aningaaserivimmili aningaasaatiminnik uninngasuuteqartunut pitsaavallaanngilaq, erniammi taama appasitsigitillugit uninngasuutitik pissarsiaqaatiginngimmatigik, Martin Kviesgaard oqarpoq.

AAMMA ATUARUK EU: Grækerit pillugit pilersaarut alloriarneruvoq - sulili pitsaanerusumik angusassaqarluni

Aningaaseriviup pisortaata aamma oqaatigaa Kalaallit Nunaata Grækenland niueqatiginngikkaluaraa Europami piffissaq ungasinnerusoq eqqarsaatigalugu qanoq ineriartortoqarnissaanik nalornissuteqartoqarnera pitsaanngitsumik sunniuteqassasoq, aamma Nunatsinnut:

- Assersuutigalugu aatsitassat akii appasitsisinnaavai tamatumalu sunniutai Nunatsinni soorunami aamma malugisinnaassavagut, Martin Kviesgaard oqarpoq.

Taanna isumaqarpoq Grækenlandimi pissutsit inissisimanerat naalakkersuisuusartut piffissaq eqqorlugu aningaasaqarnikkut aaqqissuusseqqinnernik ingerlatsisarsimannginnerannik pissuteqartut, naalakkersuisuusartullu nuna akiitsoqalersiinnarsimagaat.

- Tamannalu Grækenlandimi innuttaasunut ataasiakkaanut maanna annertuupilussuarmik kingunerluttussanngorpoq, nunap aningaasaqarnerata oqimaatigiissinnissaa isumagineqarsimanngimmat, Martin Kviesgaard taama oqarpoq.