Grækenland suli perulluliorfiujuarsinnarpoq
Tysklandimili illoqarfiit pingaarnersaanni Berlinimi taamatut eqqissiviilliortigisoqanngilaq, taamaattorli nikallungasoqarluni. Tassami Grækenlandimi naalakkersuisut pisortaat tikeraarmat tyskillu kansleriat tusarniaavigalugu Tysklandip Grækenland ajornartorsiornerani ikiorsinnaaneraa.
Grækenlandimi parlamentip ataatsimiittarfiata eqqaani akerliussutsimik takutitsisut ualimut anaattanik anaalerneqarput, ukioq ataaseq sinnerlugu qaangiummalli Grækenlandimi eqqissiviilliornerit ingasannersaanni. Gassi qulliliornartoq ingerlaartillugu parlamentip ileqqaarniuteqarnissat annertuut naalakkersuisut pingasunngormat saqqummiussaat oqallisigai. Akissarsiat appartinnissaat, pensionisiat taamaaginnartinneqarnissaat beziinalu akisooq, tamakkuupput ileqqaarniutissat ilaat, Grækenland iluamik ingerlalissappat. Parlamentip tamatumunnga peqatigitillugu nunani tamalaani aningaasaliisartut qularunnaarsinniassavai Grækenland aningaasatigut nakkaattuulivinngitsoq, taamaattumillu isumakuluuteqaratik Grækenland aningaasanik allanik taarsigassarsitissinnaallugu akiligassaminut akilersuutissaanik pisortallu missingersuusiaanni iluaqusersuutissaanik. Griikerilli aamma EU-mit tapersersorneqarnissartik atorfissaqartippaat, taarsigassarsiatigut imaluunniit griikerit nammineerlutik saperpata, EU-p ikiuinissaminik erseqqissumik nalunaaruteqarneratigut. Taamaattumik Grækenlandimi naalakkersuisut pisortaat Jorgas Papandreou ullumi Berlinimiippoq, tassami kansler Angela Merkel tassaammat EU-mi aningaasanik paarsalik. Papandreoulli ullumi checkimik tunineqarnissani naatsorsuutigissanngilaa. Centimik ataasinnguamilluunniit Grækenland tunissamaanngilarput, Tysklandimi aningaasarsiornermut ministeri oqarpoq. Griikerimmi aningaasanik atoriaannarnik ikiorneqarnissaat tyskini nunannarineqanngitsorujussuuvoq. Avisi Bit allappoq tyskit makiaartartut 67-inillu ukioqalernissamik tungaanut suleruluttarlutik. Griikerinisulli 55-inik ukioqaleraanni maanna pensionertarneq suutaarulluinnartitsissaaq. Taavalu Angela Merkel aalajangertariaqarpoq. Aningaasanik atoriaannarnik Grækenlandimut ikiuinissaq Tysklandimi qinersisaanut naleqassaaq, naaggaarpallu Grækenland nakkaattoornissaminut suli qanilleriassaaq, tamannalu Grækenlandip aqquserngini eqqissiviilliornermik annertunerulersitsiinnassalluni.
