Greenpeacermiut kitsinnginut qilersuupput
Greenpeacermiut annanniut pullartaasarsuaq saviminiusoq 500 kiilunik oqimaassusilik umiarsuup kitsinngiinut qilersuuppaat.
Greenpeacermiut oqaatigaat, annanniut pullartaasarsuaq savimiusoq taanna attaveqaqatigiinnermut atortunik nerisassanillu imaqartoq. Taamatut iliuuseqarnermikkut umiarsuup qillerutip, Stena Carronip uuliasiortitseqatigiit Chevronikkut sullillugit, qillerinera unitsinniarsaraat.
- Nunarsuatsinni nunani tamalaani naalakkersuisut, immani itisuuni uuliasiorluni qillerinernut unitsitsigallarnissamik aalajangiinissaasa tungaanut, uuliasiorluni qillerinernik navianaatilinnik unitsitsinniarnivut ingerlatiinnassavavut, Leila Deen annanniummi pullartaasarsuarmi issimasut aappaa taama oqarpoq.
Avatangiisinut ministerit 15-it Norgimi illoqarfimmi Bergenimi ataatsimiilernerinut atatillugu taama iliuuseqarput. Ataatsimiinnissami tassani immami itisuumi qillerinernik aallartitsinissamut inerteqquteqarnissaq Tysklandip siunnersuutigaa. Siunnersuulli taanna Danmarkimit tapersersorneqanngilaq.
Danmarkip tamatumunnga tapersersuinnginnera Greenpeacemit paasiuminaatsinneqarpoq.