Greenpeacermiut Cairn Energyp qullersaqarfianut isaapput
Uulia pillugu nittartakkamit upstream.comimit tamanna nalunaarutigineqarpoq, nutaarsiassaqartitsiviit allat aamma allaaserisaqartut.
Nunatsinni uuliamik maqisoortoqarnissaa pillugu sillimanissamut suliniutitik Greenpeacermiut suli ingerlakkaat taamaalilluni tamanut saqqummiunneqarpoq.
- Uppernarsaatit tamanut saqqummiunneqarnissaat uuliasiortitseqatigiiffinnut nalinginnaavoq, Cairn Energymilli nalunngilarput tamakku amigaateqarsinnaasut, pilersaarutillu paasisimasaqarluartunit, sumulluunniit attuumassuteqanngitsunit, nalilerneqassagaluarpata, inerniliinerillu eqqortuunngippata, taakkununnga peqqusiileqinassaqaaq, Greenpeace-ip Tuluit Nunaanni immikkoortortaaneersoq, Paul Morrozzo, nittartakkamut upstream.comimut oqarpoq.
Pilersaarutit isertuunneqarnissaannik Namminersorlutik Oqartussanit aalajangerneqarsimanera Cairn Energyp manna tikillugu ilumuunnginnerarpaa. Uuliamik misissuineq unitsinniarlugu sillimaniarneq pillugu pilersaarutit Greenpeacermiunit atornerlunneqarsinnaanerat ernummatigineqarmat pilersaarutut Namminersorlutik Oqartussanit saqqummiukkusunneqanngillat.
Sillimaniarnissamut attuumassutilinnik takunninnissaminnut itigartitaasimanertik pillugu Greenpeace-ip naammagittaalliutaa Nunatsinni ombudsmandsimit maanna suliarineqarpoq.