Greenpeacep uuliamik qillerivik ikkivigaa

Akerliuniarlutik iliuuseqartartut Greenpeacemeersut sapaatip ullaavani uuliamik qillerivissuaq umiarsuaq Leiv Eiriksson qallorfigaat.

Greenpeacemeersut gummibådet sukkasuuliat atorlugit umiarsuaq qillerivik Leiv Eiriksson niuluisigut qallorfigaat taannalu Nuup avataani imartamiippoq. Iliuuseqarniartartut siorna Qeqertarsuup avataani periuseq atorneqartoq atorpaat.

- Maanna iliuuseqartartut annanniartarfik simiusaq qillerivissuup qaavata ataatungaanut aalangerlugu inissipput, taamaasillutik Cairnip Kalaallit Nunaata imartaata naqqani qilleriniarnerat unitsippaat, Greenpeace sapaammi ullaap tungaa nalunaarpoq.

Umiarsuaq qillerivik Leiv Eiriksson Atammiup avataanit misileraalluni qillerivissaminut ingerlaarpoq. Misileraalluni qillerinerit Greenpeacep unitsinniarsarai mingutsitsinersuaqarnissaa aarleqqutigalugu.

Umiarsuaq qillerut Leiv Eiriksson aningaasarsiornikkut killeqarfimmik taaneqartartumiippoq, tamannalu pissutigalugu politiit annerusumik akuliussinnaanngillat taamaallaat nalunaarsuinnarsinnaallugu susoqarnersoq.

- Aningaasarsiornikkut killeqarfimmi Kalaallit Nunaanni pinerluttaalisitsinermi inatsit atuutinngilaq. Taamaammat unioqqutitsiffigineqartoq tassaavoq Holland umiarsuup Esperanzap nalunaarsorneqarsimaffia aammalu nuna taanna Leiv Eirikssonip nalunaarsorneqarsimaffia, nunatsinni politimesterip tullersortaa Morten Nielsen KNRimut taama oqarpoq.

Taanna ilanngullugu ilisimatitsivoq politiit ilisimaarigaat Greenpeacemeersut Leiv Eirikssonimut qallortut, annerusumilli qanoq iliuuseqarsinnaanatik. Umiarsuaq sillimaniarnermut killigitinneqartumik taaneqartartumut ingerlaaraluarpoq uuliasiorlutik qillerivissaminnut, killigititamilu tassani qanoq pisoqassappat politiit akuliussinnaatitaapput.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl