Greenpeacep unnerluutigineqarnissaa Ruslandip taamaatiinnarpaa
Qallunaap arnap aquttunngorniap taassuma Rusland ullut arlaqanngitsut qaangiuppata qimassinnaassagaa, avatangiisinik illersuiniaqatigiiffimmeersut oqaatigaat, tassami akimmiffiusinnaasut kingullersaat tassaammat aallarnissamut akuersissut, taannalu ullut arlaqanngitsut qaangiuppata piareerneqarsinnaassaaq.
Taama nalunaaruteqartoqarnera Greenpeace Danmarkimit nuannaarutigineqarpoq:
- Pillaatisiassaraluaminnit isumakkeerfigineqarnerat atuutilermat nuannaarutigaarput, Anne Miellu ilaquttaminik ikinngutiminillu naapitsinissaata takunissaa qilanaaraarput, tamatumunngali peqatigitillugu eqqaamassallugu pingaaruteqarpoq, Anne Mie angalaqataalu aallaqqaammut tigusaasimasariaqanngikkaluarmata, avatangiisinik illersuiniaqatigiit issittumut akisussaatitaat Jon Burgwald tusagassiuutinut nalunaarummini allappoq.
