Greenpeacep umiarsuaa Nuummi tamanut ammatinneqassaaq
Umiarsuaq Arctic Sunrise ataasinngornermi aggustip 17-iani Nuummut tikippat Nuummiunit alakkarterneqarsinnaassaaq. Avatangiisinik illersuiniaqatigiiffik tusagassiorfinnut nalunaaruteqarluni taama allappoq.
Umiarsuarmi, ukiuni 20-ni Issittumit Sikuiuitsumut kujallermut, Congomiillu Amazonamut angalasarsimasumi, inuuneq ilaatigut paasisaqarfigineqarsinnaassaaq.
Aammattaaq umiarsuarmi inuttat oqaloqatigineqarsinnaassapput Greenpeacellu Nunatsinni nunarsuullu sinnerani suliai pillugit oqaloqatigineqarsinnaassallutik.
AAMMA ATUARUK Greenpeacekkut nuannarineqarusuttut
- Kalaallit Nunaanni innuttaasut ammasumik oqaloqatiginissaannut qilanaarpugut. 70-ikkunni 80-ikkunnilu puisinniartarnermut akerliussutsimik takutitsilluta suliniuteqarnerput pissutigalugu Greenpeacep amerlasuunit suli kamaanneqarnera paasinarpoq, tamatumalu naggueqatigiinnut Inunnut kingunerlutsitsisimanera ajuusaarutigiinnarsinnaavarput.
- Isumaqarpungali ataatsimoorfigisinnaasagut avissaartuussutigisinnaasatsinnit amerlanerusut, aamma Kalaallit Nunaanni avatangiisinik ataatsimoorluta siunissami qanoq illersuiniarsinnaanerput pillugu pitsaasumik oqaloqateqarsinnaanissarput neriuutigaara - maannakkorpiarlu sajuppillatsitsisarluni misissuinerit Tunup avannaata imartaani uumassusilinnik ajoqusiisinnaasutut aarlerisagut sammivagut, Sune Scheller, Greenpeacemi suliniutinik aqutsisoq taama oqarpoq.
