Greenpeacep nunatsinni uuliasiorneq akerliuffigeqqippaa

Statoilimit, Chevronimit Shellimillu, aallartitat, Aatsitassanut Ikummatissanullu Pisortaqarfimmeersut ataatsimeeqatigissallugit, Illu Atlantikumut ullaaq takkummata immikkorluinnaq tikilluaqquneqarput.

Uuliasiortitseqatigiiffimmeersut isummaminnik siaruarterinianit tikilluaqquneqarput. Natersuaaraq aappaluttoq uuliamik qernertumik Greenpeace-imeersut kuisimavaat, Illu Atlantikullu silataanut siaarlugu.

Allagartarsuaq, paatsoorneqarsinnaanngitsumik allagartalik, umiarsualiviup avataani aamma inissinneqarsimavoq, ima allassimasoq: "Protect the Arctic: No licence to drill" - Issittoq  illersorsiuk: Qillerinissamut akuersissummik tuniseqinasi.

- Uuliasiortitseqatigiiffiit taakku nunarsuaq tamakkerlugu uuliakoornermut avatangiisinillu mingutsitsinernut pisuupput. Issittumi avatangiisit sequmissavaat, ajorluinnartumillu, ajunaarnersuarmik kinguneqarsinnaasumik, uuliakuussallutik. Tunup Avannaarsuani qillerinissaq aarlerinarlluinnarpoq, silap pissusaa allanngorartorujussuuvoq, saatsersunik sikoqarpoq iluliarujussuaqarlunilu, taamaammat uuliasiortitseqatigiiffiit tappavunnartariaqanngilluinnarput. Greenpeace-imeersoq, Issittoq pillugu oqaaseqartartoq, Jon Burgwald, tusagassiuutinut allakkamini oqarpoq.

Aatsitassanut Ikummatissanullu Pisortaqarfiup uuliasiortitseqatigiiffiillu nunarsuarmi tamaneersut, KANUMAS-imik taaguuserneqarsimasut, ullumikkut ataatsimiinnerannut pissutaavoq, Tunup avataani 2012-imi 2013-imilu misileraalluni qillerinissamut Namminersorlutik Oqartussat suliarinnittussarsiornerat.

KANUMAS-imeersut tassaapput Statoil, BP, ExxonMobil, Chevron, Shell, Japan Oil, Gas and Metals National Corporation aamma NUNAOIL A/S.