Greenpeacep legonik issittuliani mingutsitsivigigaa

Juullip inuata naggueqatigiillu Inuit uuliamik mingutsitsinermit qarsutsivigineqarnerat, inuit 3 millioninit sinneqartut sapaatip akunnerunngitsorluunniit takuaat.

Greenpeacep LEGO-p Shellimik suleqateqarneranut isornartorsiuilluni video atorlugu takusassiaa inunnit 3 millioninit sinneqartunit ullut pingasut ingerlaneranni takuneqarpoq.

Videomi legot atorlugit takusassiarineqarpoq inuit nunaqarfiat eqqissisimasoq. Tassani inuit, meeqqat pinnguartut, nannut qimmillu takuneqarsinnaapput. Videomi tunuliaqutaalluni arnaq eqqissisimalluni erinarsorpoq atorlugu ”Everything Is Awesome”.

Kisianni eqqissisimaarneq tassanngaannaq kipitinneqarpoq Shellip uuliamut qilleriviata nunaqarfik uuliamik kinertumik uuliakoorfigalugu arriitsumik qarsutsivigiartulermagu.

Takutitassiaq atorlugu siunertarineqarpoq LEGO-p Shellimik suleqateqarnini unitsissagaa, Greenpeace nittartakkamini ilaatigut taama allappoq.

- Shellimik suleqateqarneq nunarsuarmik mingutsitsinarnerpaajuvoq Issittumik ulorianartorsiortitsisoq. Aalajangerneq ajorluinnartuuvoq, meerartatsinnut nutaarsiassapalaajusoq. Taamaammat LEGO qinnuigaarput Shellimik suleqateqarnerminik unitsitsissasoq - Issittoq meerartavullu pillugit.

Youtubemit peerneqartoq

Greenpeacep videoliaa Issittumi mingutsitsinermit sukkanerulluni internettikkut siammarterneqarpoq, kisiannili Youtubemit peerneqarallarsimalluni. Tamanna Warner Brothers Entertainmentip piginnittussaanermik piumasaqarnerata kingorna pivoq.

Nipilersuummi videoliami aaqqissuuteqillugu atorneqartoq ”Everything Is Awesome” filmimit "The Lego Movie" Warner Brothers pigineqartumit tigusaavoq.

Video Politikenip nittartagaatigut takuneqarsinnaavoq



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl