Greenpeacep ilimagisamit akikinaarneruaa

Greenpeacermiut oqiliallassinnaangorput. Pinngortitamik illersuiniaqatigiit akiligassinneqartarnissaanik, Cairn Energyp piumasaqaataa eqqartuussivimmit ilalerneqaraluartoq, akiligassiissutasartussat uuliasiortitseqatigiiffiup piumasaanik ikinnerupput. Cairn Energy piumasaqaraluarpoq ullormut 15 millioner koruuninik akiliisitaasassasut. Maannalu 372.000-it naammagiinnartariaqalerpaat.
Allattoq Jens Thorin
juunip 10-at 2011 06:42

Eqqartuussissut Greenpeacemi tupaallaatigineqanngilaq, taakkua naatsorsuutigereermassuk Cairn Energy tusaaniarneqassasoq.

Pinngortitamilli illersuinaqatigiit nuannaajallattut malunnarpoq.

- Capricornip Cairn Energyllu piumasaqaataanniit minnerungaartumik akiligassiisoqartassasoq eqqartuussisoq aalajangiimmat nunannaarutigarput, Greenpeacep nunani avannarlerni immikkoortortaata allattaanera, Mads Flarup Christensen, eqqartuussinerup inernera pillugu taama oqarpoq.

Eqqartuussisoq aalajangerpoq, ullormut akiligassiissutigineqarsinnaasut 50.000 euro-ssasut, tassalu 350.000 koruunit missaat. Akiligassiissutit annerpaassagunik 7 millioni koruuniusinnaapput.

Issittumi uuliasiorluni qillerinerit unitsinniarlugit iliuuserisartakkatik nanginniarlugit Greenpeacemiit oqarput.

Taavami ullormut 350.000 koruuninik akiliisarnissaq piareersimaffigaat?

- Apeqqutip taassuma akinissaa piareersimanngilanga. Eqqartuussissut tigoqqammerparput, taava qanoq iliussanerluta eqqarsaatigissavarput qanorlu ingerlariaqqissanerluta takussallugu. Kisianni uuliasiortut Issittumiit peersinnissaannik ilungersuinnarnissarput uatsinnut pingaarpoq, Mads Flarup Christensen akivoq.

Greenpeacep umiarsuaatai Arctic Sunrise aamma Esperanza suli nunatta imartaaniipput, Cairn Energyp qillerivianut Leiv Eirikssonimut ungasigatik.

Greenpeacillu nunani avannarlerni allattaanera aperaarput,  eqqartuussaanertik periaatsiminnik allanguinissamik eqqaralersitsinersoq?

- Taamannak eqqartuussaanerup siusinnerusukkut unitsinnikuunngilaatigut maannakkut aamma taamaannavianngilaq. Kisianni toqqaannartumik orniguttarluta iliuuseqartassanerluta periaatsilluunniit allat atussanerlutigit eqqarsaatigeqqaassavarput, Mads Flarup Christensen oqarpoq.

Pinngortitamik illersuiniat nuannaarutigaat, eqqartuussisup tunngavilersuutimini ilanngummagu, upalungaarsimanermut pilersaarutip saqqummiunneqarnissaa tamanut soqutiginartuussasoq.

Cairn Energyp eqqartuussinermut isummernera uuliasiortitseqatigiiffiup tusarliisarnermut pisortaata oqaaseqarusunngeqisup ima oqaatigaa:

- Eqqartuussineq ajorinngeqaarput. Akiligassiisoqartassasoq eqqartuussivik aalajangerpoq, qillerinermilu akornusersuisoqassagaluarpat, akiligassat annerpaaffilerpaat. Tamanna ajorinngilarput. Kalaallillu Nunaanni sulinitsinni isumannaallisaaneq pingaarnerpaavoq, David Nisbet oqarpoq.

Akiligassiissutaasartussap angissusia uuliasiortitseqatigiiffiup iluarisimaarneraa, arlaleriarlugu aperigatsinni akiumanngilaq, naak qillerivimmut qallortoqaraangat kinguarsagaaneq imminnut ullormut 30 millioner koruuninik aningaasartuutaasartoq unneraluarlugu.

Aamma atuaruk