Greenpeacemut tunngasoq aqagu ilimagaat

Unnerluussut tigusaq malillugu 20.000 koruuninik akiliisitaasinnaapput. Aamma nunamit anisitaanissaannik piumasaqaat Nunanit allanit nunasiniartunut Danmarkimi allaffeqarfimmit suliarineqartussaq suli utaqqineqarpoq. Taamaammat ilimagissavarput Greenpeacemeersut nunamit anisitaassasut aamma Kalaallit Nunaannut ukiumi ataatsimi tullermi peqqusaassanngitsut, Finn Meinel oqarpoq. Danmarkimi nunanit allaneersut pillugit sullissivimmi inatsisit malillugit aalajangiinissaq aqagu ataasinngornermi periaannaavoq.

Greenpeacep generalsekretæria Kumi Naidoo suleqataalu norgemiu Ulvar Arnkværn Nuummi ulluni arfineq-marlunni pineqaatissinneqarsimasunut inissiisarfimmiissapput . Tamanna Nuup Eqqartuussiviata aamma Nunatta Eqqartuussiviata aalajangerpaat.

- Naidoo Arnkværnilu ulluni arfineq-marlunni imaluunniit Kalaallit Nunaannit anisinneqarnissamik tungaanut tigummigallagaassapput. Greenpeacemeersut nunamit anisinneqarnissaasa tungaanut tigummigallarneqarnissaannik unnerluussisussaatitaasut piumasaat taamaalilluni malinneqarpoq. Tigummigallarneqarnerannut pissutaavoq, anisinneqalerunik aasariaannaanissaat aamma nunatsinniitillutik pinerloqqinnginnissaat, eqqartuussissuserisuat Finn Meinel oqarpoq.

Greenpeacemi illersuiniaqatigiinnut ilaasortat marluk, Cairn Energyp qillerivianut Leiv Eiriksson-imut  tallimanngormat qallulermata politiinit tigusarineqarput. Qallornerannut pissutaavoq uuliasiortitseqatigiit issittup imartaani uuliasiornerminnut atatillugu upalungaarsimanissamut pilersaarusiaannik takorusuillutik atsiornerit 50.000-t tunniunniarneqarmata. Qillerivissuarmut qaqisut marluk nalunaaquttap akunnera inorlugu qaqeqqareerlutik politiinit tigusarineqarput.

Tigusarineqartut inunnik allanik eqqissiviilliortitsisimasutut aamma uuliasiortoqartillugu imartap nunalluunniit qilleriviusup eqqaa kaajallallugu sillimanissaq pillugu Namminersorlutik Oqartussat nalunaarutaat malillugu  palleqqunngisaq iserfigisimammassuk pasineqarput.

Aamma qillerinerit aallartimmatali Greenpeacep iliuuserisaannut peqataasimasutut pasineqarput, kisianni uppernarsaatissaqarnersoq suli nalunartoq, Finn Meinel naliliivoq.

Taavami suna pineqaatissiissutaasinnaava?

- Illersukkama unnerluussut tigusaat malillugu 20.000 koruuninik akiliisitaasinnaapput. Aamma nunamit anisitaanissaannik piumasaqaat Nunanit allanit nunasiniartunut Danmarkimi  allaffeqarfimmit suliarineqartussaq suli utaqqivarput. Taamaammat ilimagissavarput Greenpeacemeersut nunamit anisitaassasut aamma Kalaallit Nunaannut ukiumi ataatsimi tullermi peqqusaassanngitsut, Finn Meinel oqarpoq.

Danmarkimi nunanit allaneersut pillugit sullissivimmi inatsisit malillugit aalajangiinissaq tassa suli utaqqineqarpoq. Meinelillu ilimagaa aqagu ataasinngornermi aalajangiisoqarsimassasoq.

Finn Meinelip aamma ilisimatitsissutigaa, Greenpeacemeersuk marluk pasilliutit pillugit  pisuunerlutik pisuunnginnerlutilluunniit nalunaarnissamut suli aalajanginngitsut.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl