Greenpeacemeersut Hollandimi tigusarineqartut

Gazpromip Issittup imartaani qillerivittaavanit russit umiarsuaata uuliamik assartuutip uuliamik assartueqqaarneranik Greenpeacemeersut 31-t unitsitseriaraluartut Hollandimiut politiivinit tigusarineqarput.
Allattoq mlk, Simon Uldum
maajip 02-at 2014 07:23

Umiarsuaq uuliamik assartuut Hollandimi Rotterdamip umiarsualiviani talikkiartortillugu akornusersorneqarpoq.

Greenpeacemeersunut ilaavoq umiarsuup aquttua Danmarkimeersoq Anne Mie Roer Jensen, Ruslandimi siorna akornusersuioqarnerata kingorna russit parnaarussivianni qaammatini arlalinni parnaarussaaqqasoq.

Greenpeacemeersut umiarsuup uuliamik assartuutip Mikhail Ulyanovip saneraanut oqaatsit 'Issittumi uuliasiortoqassanngilaq' allappaat.

Umiarsuullu naalagaata russip taamaaliortoqarnera narrutsaatigeqaa.

- Umiarsualiviup iluani umiarsuup ingerlanniarnera Issittumi angalanermit navianannginnerunngilaq, pingaartumik umiarsuup allap umiarsuaq assartuut uuliamik akuiarneqanngitsumik 67.000 tonsinik usilik umiarsuit arlallit angallaffigisaanni akornusersuitillugu, aviisi Globe and Mail naapertorlugu taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq