Greenpeacemeersut anisitaatigatik tigummineqassapput
Eqqartuunneqartut tamarmik eqqartuussiviup inernerititaa akueraat, ulluni 14-ini periarfissinneqarlutik Nunatta Eqqartuussivianut ingerlatitseqqiinissaminnik.
Tallimanngormat eqqartuunneqarput Greenpeacermiut allat marluk. Ullumi eqqartuussivimmut sassartitsineq tallimanngornermut naleqqiullugu eqqissisimaneruvoq. Tallimanngormat eqqartuussinermi Hannah McCarthy aamma Luke Jones tamarmik 20.000 koruuninik akiliisussatut pineqaatissinneqarput, ullumilu eqqartuunneqartut 18-it aamma taama pineqarlutik, taamaattorli taakku ulluni 14-ini periarfissinneqarlutik tamassuma Nunatta Eqqartuussivianut ingerlateqqinnissaanut.
Eqqartuunneqartut ulluni 14-ini tigummigallagassanngortitaaneri unnerluussisumit nuannaarutigineqarpoq.
- Nunatsinnit anisitaanissaasa tungaanut tigummigallagassanngorneri naatsorsuutigereersimasarpullu nuannaarutigaarput. Danmarkimi nunat allamiut pillugit sullissiviup maanna anisitaanissaannut uppernarsaatit suliarileruttorpaat, tassalu taakku anisitaanissaannut suliaq maanna aallartilluni. Ulluni 14-ini tigummigallagassanngorneri aallarnissaasa tungaannut iluarisimaarparput, unnerluussisoq Finn Jeppesen oqarpoq.
Unnerluutigineqartut 18-iusut ilaata, Ben Ayliffeip pineqaatissinneqarnini eqqissilluni tiguaa.
- Avatangiisit pillugit suliniuteqarnerput pissusissamisoortoq eqqarsaatigalugu pineqaaatissinneqarnerput ataqqivarput. Kisianni eqqarsaatigineqartariaqartoq unaavoq, tassa Cairn Energyp soqutigittaalluni Kalaallit Nunaata pinngortitarsua akigalugu qanoq iliuuseqarmat, tassami uuliamik maagaannaq maqisoortoqariaannaavoq. Uangut isumaqarpugut Cairn Energy Kalaallit Nunaanni qillerisariaqanngikkaluartoq, Ben Ayliffe oqarpoq.
Avatangiisinik illersuiniaqatigiit taama amerlatigisut maanna susinnaajunnaartutut oqaatigineqarsinnaapput, tamatuma kinguneranik Greenpeace qanoq iliorniarnersoq aperineqarami Ben Ayliffe naqissusiivoq, Nunani issittuni Kalaallit Nunaat kisimi nunaanngimmat navianartorsiortinneqartoq.
- Kalaallit Nunaat kisiat eqqarsaatiginngilarput, allanik issittumi nunaqarpoq aamma, tassalu tamannarpiaavoq Greenpeacep suliniutaa annertuupilussuaq. Alaskami aamma Sibiiriami suliniuteqarpugut taamatullu ingerlaannassalluta. Cairn Energymut assuarinninnerput suliniutitta ilagiinnarpaa.
