Greenpeacekkormiut Nunatsinniikkunnaarput

Greenpeacep umiarsuai marluk maaniikkaluartut Nunatta imartaa qimareerpaat. Taakku massakkut Canadap sineriaaniipput. Greenpeacermiut maaniittut kingullit arfineq marluusut, Nunatsinnit ullumi anisinneqarput. Tamanna pivoq Greenpeacermiut allat tallimat ippassaq anisinneqareersullu aamma arfinillit marlunngormat anisinneqareerput.
Assi © : Soluluyna Familia
Allattoq Elisa Isaksen
juunip 16-at 2011 11:10

Politiinit unnerluutiginnittut sinnerlugit Finn Jeppesen KNR-imut ullaap tungaani ilisimatitsivoq, Greenpeace Nunatsinniititaaruttoq.

Nunatsinnit anisitaasut aallareernerisigut pappilissatigut suliassat politiit suliassarilerpaat, matumani aggustip aappaani eqqartuussivimmut sassartitsinissaq piareersarneqartussaammat.

Greenpeacermiut tigusarineqartut tamarmik - siulliit marluk Cairn Energyp qilleriviani Leiv Eirikssonimi annanniummut ikillutik, ulluni unnuanilu sisamani akerliussutsiminnik takutitsisut aamma kingulliit 18-it qillerivimmut ikillutik nalunaaquttap akunnerini arlalinni issimasut, Nunatsinnit anisitaanissamik tungaanut politiinit tigummisaanertik naammagittaalliuutigaat.

Tigusaasut Nunatsinnit anisitaanissamik tungaanut politiinit tigummineqaratik, taamaallaat politiinut nalunaartussaatitaanissartik piumanerusimagaluarpaat. Taamatulli kissaateqarnerat Nuummi Eqqartuussiviup tusaanngitsuusaarpaa, tamannalu Nunatta Eqqartuussiviata aggustip aappaani aalajangiiffigissavaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq