Greenpeacekkormiut maanna eqqartuussaapput
Greenpeacemi ilaasortat marluk sillimaniarnermut killigititaasumik aamma angerlarsimaffimmi eqqissiviilliornermut inatsimmik unioqqutitsisimasutut pasineqarlutik eqqartuussivimmut sassartinneqarput.
Greenpeacemi ilaasortat 20.000 koruuninik akiliisinneqarlutik pineqaatissinneqarnissaat Nunatsinnillu anisitaanissaat politiinit ilimagineqarpoq.
Greenpeacep umiarsuaa Esperanza tallimangormat radioaviisimit pulaarneqarmat, Hannah aamma Luke oqaloqatigineqarput, Hannah USA-mi New Orleansimeersuuvoq, Luke Tuluit Nunaanni Yorkshiremeersuulluni.
Kalaallit Nunaata avataani uuliasiornermut akerliunerminnut tunngavilersuutaasa pingaarnersaraat, siorna mexicop kangerliumanersuani uuliasiorfimmi ajunaarnerup kingorna uuliamik annertuumik maqisoortoqarnera.
Greenpeacekkunnni ilaasortat marluk Nuummi eqqartuussivimmi eqqartuunneqarnerat, Greenpeacep umiarsuaannit marluusunit Kalaallit Nunaata avataaniittunit, malinnaaffigineqarput. Umiarsuit taakku Davis Strædemiipput.
Greenpeacemi tusagassiisartoq Sune Scheller oqaluttuarpoq, umiarsuit Esperanza aamma Arctic Sunrise - uuliamik qilleriviup Ocean Rig Corcovadop kujataani maannakkut inissisimasut.
Umiarsuit taakkua marluk inuttaat ullup qeqqata siorna naapeqatigiissapput, iliuusissatik pillugit oqaloqatigiissallutik, inuttat taarsernissaat umiarsuarnilu suliassat aaqqivigineqassallutik.
Greenpeacekkut inatsisilerituui ulapinnerugunarput, Greenpeace uuliasiortunik akornusersueqqissagaluarpata, ullormut 15 millionit koruuninik akiliisinneqarnissaannik ilimasaarinerup ippassaq saqqummiunneqarnerata kingorna.
Cairn Energyp inatsisilerituuisa Holland-imi Greenpeace ataasinngorpat naapittussaavaat.
Akiliisitaannginnissatsinnut periarfissat qanoq ajunngitsiginersut ilisimasaqanngilanga, Greenpeacep nittarsaassinermik pisortaa Mads Flarup Christensen KNRimut ullup qeqqata siorna oqarpoq.
Eqqartuussinerit inernerat qanorluunniit ikkaluarpat, Greenpeacep iliuuserisartakkani ingerlatiinnassagai, Mads Flarup Christensen oqarpoq.
Iliuuserisakkavut ingerlaatiinassavagut, apeqqutaassaarli Hollandimi eqqartuussisut aalajangernerat qanoq inerneqassanersoq, tassangaaniillu iliuusissavut paasiumaarpagut.
Cairn Energy oqaaseqartinniarsimagaluarparput tamannali ullaap tungaa iluatsisinnaasimanngilarput.
