Greenpeace sinnerlugu sukataaruteqartartoq iperagaasussanngorpoq

Greenpeacemeersut suli isumakkeerfigineqanngillat, suliat eqqartuussivitsigut ataasiakkaarlugit suliarineqaqqaartussaammata. Greenpeacemeersut qaqugu angerlarsinnaassanersut taamaammat suli ilisimaneqanngilaq.

- Anne Mie suleqativullu allat sinnerlugit nuannaaqaagut. Politikkikkulli tunngaveqartumik suleqatitta iliuuseqarfigineqarnerat, qaammatinilu marlunni parnaarussaaqqasimanerat nuannaarutiginavianngilarput, nunami tamalaat inatsisaat unioqqutillugit tigummineqarsimammata, Issittoq pillugu Greenpeacep oqaaseqartartua Jon Burgwald, oqarpoq.

Naak Greenpeace-rmiut 30-t pineqartut iperagaanissaat, umiarsuaatallu Arctic Sunrisep iperagaanissaa, Naalagaaffiit Peqatigiit Immat atorneqarnerat pillugu eqqartuussiviata aalajangereeraluaraa, Anne Mie Roer Jensenip angerlarsinnaannginneranik nalunaarut, russit, inuttaanut tallimanngormat apuuppaat.

Sakkutuut Ruslandimeersut immikkut sungiusakkat Greenpeacep umiarsuaanut Arctic Sunrisemut ukioq manna septembarip 18-iani ikipput, inuttallu tigusarineqarlutik. Ruslandip Issittup imartaani uuliasiorluni qillerineranut Greenpeace-rmiut akerliuniarlutik iliuuseqarnerisa nalaanni sakkutuut umiarsuarmut ikipput.