Greenpeace: Qujanartoq BP Kalaallit Nunaaliassanngimmat

- Kalaallit Nunaanni uuliamik ujarlernissamut BP-p maanna unitsitsinera uuliasiortunit allanit aamma malinneqartariaqaraluarpoq, Greenpeace-mi silap pissusaa pillugu suleqataasoq, Jon Burgwald tusagassiutinut nalunaarummi allappoq.

Mexicop Kangerliumanersuani uuliamik maqisooreernerup kingorna BP Kalaallit Nunaanni uuliasiorniaratik, aviisimut The Guardianimut oqarput. Tamatumunnga pissutigitinneqarpoq ajutoortoqariasaassagaluarpat politikikkut kingunerisinnaasai BP-p eqqarsaatigisimagamigit.

- Qinnuteqartunut ilaanngilagut, BP-mi sulisut ilaat kinaanerminik nalunaaruteqarusunngitsoq aviisimut oqarsimaneragaavoq, taassuma nassuianngilaa sooq BP pilersaarnerminik taamaatitsiinnarsimanersoq.

Kikkut qinnuteqarsimanersut akuersissummillu pisimanersut, Aatsitassanut Pisortaqarfiup sapaatip akunnerini tullerni nalunaarutigisavai.

Qeqertarsuup kitaata avataani qillerinissanut sisamanut Cairn Energy akuersissutinik pereerpoq. Cairn Energy-llu qillerinerini Greenpeace-kkormiut qilleriviit eqqaanniittuarniarlutik oqarput, taakkulu kalaallit naalakkersuisoqarfiinit malinnavigineqaqqissaarput.

Qilleriviup eqqaani sumik annertunerusumik susoqarsimanngitsoq, Kalaallit Nunaanni politimesterip tullersortaata, Morten Nielsenip oqaatigaa, - Ulloq pissanganartoqanngitsoq, Morten Nielsen naggasiilluni oqarpoq.