Greenpeace Qeqertarsuup avataani qillerisunik unitsitsiniarpoq

Greenpeace-p umiarsuaa Esperanza Qeqertarsuup sioraani Cairn Energy-p qilleriffiata qanittuaniilerpoq.
aggustip 23-at 2010 09:45

Taama nalunaarpoq politiken.dk.

Sapaatit akunnerini kingullerni Cairn Energy misiliilluni qillerinissanut normu 3-mut 4-mullu akuersissummik pissarsivoq. Politiken.dk-p allaaserisaa naapertorlugu Greenpeace-p misiliilluni qillerinissat taakkua unitsinniarpai.

Politiit sakkutuullu imarsiortut najuupput. Akerliuniarneq qaqugu aallartissanersoq nalunarpoq aammalu eqqissisimatitsiniartut Greenpeace-p akerliuniarnissaanut qanoq iliuuseqarumaarnersut ilisimaneqarani.

Umiarsuaq tamaanga ippassaq annguppoq. Politiken.dk-p allaaserisaa naapertorlugu qillerivimmiit kilometerit tallimat iluanni timmisartoqqusiunnaarneq kiisalu imaatigut 500 meterinit qaninnerusumik palliguteqqusiunnaarneq atulersinneqarsimavoq.

Qallunaat sorsuutaat angisooq Experanzamik attaveqarsimavoq, tassanilu umiarsuup naalagaa killiliussatut akuerineqartup iluanut piguni tigusaajumaartoq mianersoqquneqarsimalluni.

Politiken.dk pisunut peqataanissaminut akuerineqarsimavoq ualerulu nunavimmiit umiarsuarmut ingerlassisoqassalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq