Greenpeace qanorluunniit iliuuseqariataarsinnaassaaq

Cairn Energymi Inatsiseqarnikkut Tuniniaanermullu pisortaq Simon Thomson ima oqarpoq:

- Umiarsuit Kalaallit Nunaata imartaaniippata taava Kangilinnguani Sakkutooqarfiup soorunami nakkutigisassarai. Kangilinnguani Sakkutooqarfik siorna suleqatigilluarparput, suleqatigiinnerullu ukioq manna allaanerulersimanissaa naatsorsuutiginngilarput. Sakkutooqarfiup siunnersorumaarpaatigut, soorlu umiarsuit allat Kalaallit Nunaata imartaanut anngussimasut siunnersorneqartartut, Simon Thomson oqarpoq.

Qillerivilli Leiv Eiriksson, taamalu Greenpeace-ip umiarsuaa Esperanza, Greenpeace-illu umiarsuaata aappaa Arctic Sunrise, kinguaattooqqalaartoq, Nunatta imartaanut suli anngutinngillat.
Nunattalu imartaanut suli anngutinngimmata, qillerivik Greenpeace-ikkormiunit ikkivigineqassagaluarpat Sakkutooqarfimmiit iliuuseqarfigineqarnavianngitsoq, Kangilinnguani Sakkutooqarfimmi sakkutuut naalagaasa allaffianni pisortap Jan Bøgstedip oqaatigaa.

Leiv Eiriksson Greenpeace-illu umiarsuaatai nunat tamalaat imartaaniippata, umiarsuaq alapernaarsuut Vædderen oqartussaaffeqanngitsoq, Jan Bøgstedip oqaatigaa.

Inuit Greenpeace-imeersut sisamat Cairn Energyp qillerivia Stena Don Qeqertarsuup avataaniittoq siorna ikkivigaat.

Cairn Energyp qillerinini taamanikkut unitsikkallarpai, akunnerillu 40-t qaangiummata silapilulermat aatsaat Greenpeace-imeersut umiarsuarmut utiinnarput. Taamaattoq ukioq manna taamaaliortoqaqqissinnaanissaa uuliasiortitseqatigiiffiup sillimaffiginngikkaa aamma oqaatigineqarpoq.

Esperanzap tusagassiisartua Sune Scheller ullumi aamma oqarpoq qillerivik Leiv Eiriksson qanillattorneqarallarnavianngitsoq.

Avatangiisit pillugit Greenpeace-imi suliallip Jon Burgwaldip ippassaq oqaatigerusunngilaa Greenpeace ukioq manna iliuuseqalersaarnersoq.

Greenpeace-illi iliuuseqarnissaa Cairn Energymit ernummatigineqarpa? Simon Thomson akivoq:

- Uanga tamanna aalajangigassarinngilara, Cairn Energymi Inatsisinut tunngassusilinnut tuniniaanermullu pisortap Simon Thomsonip oqaatigaa.

Cairn Energyp qillerivia Leiv Eiriksson, Nuup avataani qilleriviffiusussatut immikkoortitamut Lady Franklinimik taaguuserneqarsimasumut maanna ingerlaartoq, Cairn Energyp ilisimatitsissutigaa.
Misiliilluni ukioq manna qilleriffissat katillugit sisamaapput.
Qillerivik massakkutut sukkatigaluni ingerlaaginnassappat qilleriffiusussamut aqagu anngutissangatinneqarpoq.

Cairn Energyp isumanaallisaaneq pillugu qanoq pilersaaruteqarnersoq, Qanoruumi unnugu takuneqarsinnaassaaq.