Greenpeace periutsinik allannguigaluartoq pereersut allanngunngillat

Qaammatit marluk matuma siorna uuliasiortitseqatigiit Cairn Energy innuttaasunik Aasianni ataatsimiisitsimmat 70-it ataatsimiigiarput. Taamanikkut uuliasiorluni qillerinissat pillugit isornartorsiuisoqanngilaq. Paaserusunneqartoq tassaaneruvoq qillerinerit kalaallit qassit suliffissarsiffigissaneraat.

Greenpeaceli pingasunngornermi unnukkut Aasianni ataatsimiisitsivoq uuliasiorniartunut isumaqatigiissut naammaginagu. Tassani inuit 20-it missaat taamaallaat takkupput. Amerlanerit aamma Greenpeace isornartorsiorpaat.

- Ataatsimut isigalugu isumaqarpunga ataatsimiinneq iluatsilluartoq. Kisianni kalaallit suli amerlanerusut ataatsimiigiarsimanissaat kissaaatigissagaluarpara. Kisianni oqariartuutigisarput Aasiammiut tusarusuppallaarsimagunanngilaat. Cairn suliffissanik oqariartuuteqarpoq. Uagulli mianersoqqussutigaarput uuliarsiorfiit qanoq iliorsinnaatitaanerisa killilersimaarneqarnissaa, Jon Burgwald Greenpeacemi avatangiisit pillugit sulialik oqarpoq.

Taanna Greenpeacemeersulul arlallit ullualunni Aasianniippoq quppersakkanik innuttaasunut agguaassinikkut inuit ataatsimiigiarnissaannut kajumissaarlugit.

Greenpeacemeersut nalunngilluinnarpaat nunatsinni nuannarisaavallaaratik. Taaamattumik suleriuseq nutaaq atorlugu Namminersorlutik Oqartussat kiminniarsaraat Cairn Energymut sukannernerusunik piumasaqaateqaqqullugit. Piumasaraat kalaallit amerlanerit sulisissagaat, avatangiisit mianersuunnerussagaat aammalu uuliarluertoqassagaluarpat upalungaarsimaniarnermut pilersaarummik saqqummiussisariaqartut. Aamma aningaasivitsik ammassagaat piumasaraat:

- Savalimmiuni uuliasiornermi sulisussat 3.600-ut uuliasiortitseqatigiiffiit akiligaannik ilinniartinneqarput. Kalaallit Nunaanni akiliuteqarneq ajorput. Aamma Norge-mi Canadamilu ilinniartitsivoq akilertarpaat. Aamma nunani taakkuni pingasuni pineqartuni akuutissanik imaanut eqqaasarnermut malittarisassat sukannernerupput, Jon Burgwald taama oqarpoq.

Tamakkuli tunngavilersuutit tusarnaariat soqutigerpianngilaat. Arlallit oqaaseqartarput Greenpeace 1979-miit 1983 puisit amii pillugit akerliuniarmat kalaallit puisinniartarnerat eqqungaasimasoq.

- Greenpeacep piniartut inuussutissarsiornerat asersorsimavaa. Maanna aamma inuiaqatigiit eqqoqqinniarsarilerpaat. Naluara taamaasiornikkut suna anguniarneraat. Isumaqarpunga uuliasiornerput ingerlaqqittariaqartoq. Aamma nunat allat assigalugit aningaasarsiorfigisariaqarparput, tusarnaariat ilaat Johan Olsen taama oqarpoq.

Isornartorsiuisut ilaat ima oqarpoq:

- Cairn aningaasaateqarpoq atorfinitsitsisarlunilu. Apeqqutaanngilaq uuliamik nassaarnersut imaluunniit naamik. Greenpeace takkuppoq aningaasaateqaranilu. Sooq tusarnaassavagut? Kalaallit Nunaataana siunissaa aserorniarsarigaat, tusarnaariaq atiminik isertuusserusuttoq taama oqarpoq.

Greenpeacep aamma paasereersimavaa Kalaallit Nunaata imartaani uuliasiorneq unitsinnaviarnagu. Taamaammat innuttaasut kajumissaarpaat Aatsitassat pillugit pisortaqarfik sakkortuumik sunnerniaqqullugu uuliasiorneq annertunerpaamik iluaqutaaniassammat.

- Soorunami kalaallit atugarissaarnissaq, ineriartorneq, namminersorneq suliffissaqarnerlu pisinnaatitaaffigaat. Kalaallit Nunaata tamanna qulakkiissappagu Cairn Energy piumasaqarfigineqartariaqarpoq. Maannamut taamatut pisoqarsimanngilaq. Aatsitassat pillugi t pisortaqarfik taamatut ingerlaannassappat Cairn Energy uuliasiornermi iluanaartuussaaq kalaallit inuiaqatigiit pinnatik, Jon Burgwald Greenpeacemi avatangiisit pillugit sulialik oqarpoq, taassumalu unnuk naallugu uteqattaartuarpaa uuliasiortut akikinnaarinialersut.

- Savalimmiut qiviarutsigit akuersissutit tamaasa 60 millioner koruuninik pissarsiffigisimavaat. Kalaallit Nunaanni taamaallaat 60.000 koruunit pissarsiarineqarput, Jon Burgwald oqarpoq.