Greenpeace-p akerliussutsimik takutitsinera eqqissisimavoq

Greenpeace uumasunillu illersuiniaqatigiit allat WSPA-mi ilaasortat nuannaarlutik iluarusuppasillutillu Anchoragemi Arfattassat pillugit isumaqatiginninniarfimmut Hotel Captain Cook-ip silataanut ippassaq ualikkut marlunnguutereeraatik anngupput. Suleqaterput Else Løvstrøm Arfanniarneq pillugu ataatsimiititaliarsuup IWC-p ataatsimiinnerani malinnaasoq oqarpoq.

Akerliussutsimik takutitsisut kiinaat nuannaarpaseqalutillu naammaginnippaseqisut isikkuat piffissami kingullermi nunarsuup sinnerani tusagassiuutit aqqutigalugit saassussisaqattaarnerannut tulluutinngivissumik pissusilersorlutik meeqqatik qimmitillu nassarlugit pisorusaarput, allaanngivillutik ikinngutitit ilaquttatillu ilagalugit aliannaarsaarlutik pisuttuaqatigiittut.

Akerliussutsimik takutitsisut hoteli ataasiarlutik kaajallariarlugu sukkanerpaamik qimaguteqqipput. Taamaasilluni ingammik Japanimiut oqariartuutaat eqquuttutut isikkoqaannarpoq. Japanimiut oqariartuutigaat uumasunik illersuiniaqatigiit soqutigisarinerugaat tusagassiuutit aqqutigalugit, arferit illersorneqarnissaat sakkugalugu, tusaqqusaarnermikkut misiginneqataasorpassuarnit aningaasanik pissarsipallannissartik. Ukiumut aningaasat katersorneqartussat isertinneqareermata ukioq ilivitsoq eqqissisimaarnissartik tullinnguuttoq iluarisimaarpasippaat, ukiup tulliani aningaasanik katerseqqinnissamik tungaat tikisseeqqissallugu.