Greenpeace Nuummiunit tikilluaqqusaavoq

- Isumaqarpunga arferit pillugit inunnut qaammarsaalluartarnerat pingaaruteqartoq, Kalaallimmi aamma soqutigissaqaat arferit ajunnginnersut, ajunngippatami piniagassaassammata, umiarsuarmut pulaartoq Sussi Holm taama oqarpoq. 

Greenpeace 1970-80-kkunnili puisinniartarneq pillugu paasititsiniaammalli kalaallinit nuannarineqanngillat. Paasititsiniaanerummi kinguneraa piniartut puisit piaraaninik toqoraasartutut nalilerneqarnerat, taamaalillutilli piniartut puisinniarneq inuuniutigisinnaajunnaarlugu. 

Greenpeace maannakkut Kalaallit Nunaanukarpoq avannaani sajupillatitsisarluni misissuinerit immammi uumasunut ajoqusiissanersut uppernarsarniarlugu. Sajupillatitsilluni misissuinerit uuliasiornissamut alloriarneq siulliusinnaavoq.

Greenpeacekkut nalunaarmarta Kalaallit Nunaanukarniarlutik nittartakkaminni facebookikkut, nuannarinninngitsorpassuarniik qisuariarfigineqarput. Oqaaseqartut ilaat ima allapput: "Isumaqanngilanga maani nuummi tikilluaqqusaasusi. Piniartunummi aserorterinikooqaasi." "Greenpeace kusanaatsuliortuupput, kulturinullu aserorterisuullutik." 

Taamaakkaluartorli, inuit pulaarniarlutik takkuttut Greenpeacemut nuannaartorinnittuupput. Inunnullu paasititsiniaasarnerinut iluarinnittuullutik.

Aamma atuaruk ASSIT Greenpeacep umiarsuaanut alakkartereqataagit

Greenpeacemut paasinissaa pingaaruteqarmat, pulaartut ilaat Michael Jensen iluarisimaarinnippoq.

- Sumiissinnaappulluunniit, maannakkut maaniipput avannaanut mississuiartorlutik, taamaaliornerallu ajorinngilara, 

Inuit aggialluarsimasut suliniummut pisortap Sune Shellerip oqaatigaa.

- Aggiasut assigiinngissimaqaat, soorunami ilaasa nuannarinngilaatigut, kisianni inussiarnersut suliatsinnullu tapersersuisut amerlapput.