Greenpeace Kalaallit Nunaata kitaani tunumilu angalavoq
Sermersuup ilaa, Qaanaap qalasersuullu akornanniittoq, kaanngannginnerani, Greenpeacep umiarsuartik Arctic Sunrise angallatigalugu Qaanaap avannaanut ingerlaarput.
- Qaanaap avannaani sermimi iigartartumi Petermann Glecsherimi,
annertoorujussuaq silap pissusaata allanngoriartonerata kingunerisaanik kaangariartorpoq. Sermeq kaanngariartortoq takussutissatut uppernarsaatitullu atorlugu naalakkersuinermik suliaqartut oqaluttuunniarlugit Greenpeace ilisimatuut nunarsuarmi tamarmi tusaamaneqartut ilagalugit Kalaallit Nunaata sineriaani tunumilu qaammatini marlunni angalaniarput, Mads Flarup Christensen Greenpeacep nunani avannerlermi pisortaa oqarpoq.
Silap pissusaata allangoriartornera pillugu decembarip qaammataani Københavnimi nunat tamat peqataaffigissaannik ataatsimeersuartoqartussaavoq, tassanilu isumaqatigiissumik atsiortoqassaaq.
- Isumaqatigiissuteqarnissamut nunat ilaat nangaassuteqarput, taakkulu isumaqatigissuteqarnissamut peqataanissaannut uppernarsaammik takusutissamik pisariaqarput, Mads Flarup Christensen oqarpoq
Sermeq, Petermann Gleschterimiittoq, kaanngariartortoq Amerikami New Yorkip qeqertaatut Manhattenitut annertutigisoq, Greenpeacemiit oqaatigineqarpoq. Greenpeacekkut umiarsuaat Arctic Sunrise qulimiguulimmik useqarpoq attaaveqaatillu nutaaliaanerpaat atortuneqarlutik. Umiarsuaq aqagu Nuummiit aallassaq Sisimiunullu aqqusaarpat ilisimatuut atortui 800 kilonik oqimaassuseqartut usiuliunneqassapput. Umiarsuarmi aamma ilaassaaq silap pissussaa pillugu ilisimatooq amerikamioq Jason Fox Naalagaaffiit Peqatigiit avatangiisit pillugit ataatsimiittartuanni ilaasortaasoq.
Pinngortitamik avatangiisimillu illersuiniaqatigiit Greenpeace Kalaallit Nunaannut tikikkaangata akerliussutsimik takutitsivigineqartarput, puisit piniarneqartarnerat pillugu akerliunerat isumaqatigineqanngimmat. Ippassaq Nuummut tikinneranni akerliussutsimik takutitsivineqanngillat, taamaattorli Mads Flarup Christensen oqanera malillugu Greenpeace Kalaallinit suli nuannarineqarpallaanngillat.
Greenpeacekkut Kalaallit Nunaata kitaani tunumilu angalanerat septembarip qaammataa tungaanut pissaq. Qaanaap avannaani sermeq Petermann aggustip qaammataata arfineq pingajuata tungaanut ilisimatuunit misissuiffigineqassaaq, tamatumalu kingorna Kulusummut ingerlassapput sermeq kangerlussuarmiittoq mississuiffigissallugu. Tamatuma kingorna Svalbardimut angalassaput, immat sarfai misissoriartorlugit.
