Greenpeace: Issittup uuliaa attussanngilarsi
Sikusiussuaq Shell-ip issittumi uuliasiornerani ikiuuttussatut attartorneqartoq arlaleriarluni Greenpeacemeersunit ikkivigineqartarpoq. Tamanna pissutigalugu sikusiut Alaskamut ingerlaarnermini kinguaattoortoq Greenpeacep issittoq pillugu oqaaseqartartua Jon Burgwald oqarpoq.
- Isumaqarpugut issittortumi uuliasiorluni qillerineq illersorneqarsinnaanngitsoq maannalu iliuuseqarnitsinni tamanna qitiutipparput. Issittumi ima uuliaqartiginngilaq avatangiisit innarleratarsinnaanerat akigalugu uuliasiussalluni, Jon Burgwald oqarpoq.
Ukiuni aggersuni Nunatta imartaani uuliasiornissaq pisussaavoq Jon Burgwald-illu oqaatigaa avatangiitsinik illersuiniaqatigiittut qanoq iliuuseqarsinnaanertik isumaliutigineqarsinnaasoq.
- Suli aalajangiiffiginngilarput Kalaallit Nunaata imartaani qanoq iliuuseqassanerluta. Kisianni qularutigineqassanngilaq Kalaallit Nunaata imartaani uuliasiornissamut akerliunerput. Naak tamanna Kalaallit Nunaata aningaasaqarniarneranut sunniuteqartussaagaluartoq tamaviaarutiginiarput tamaani uuliasiortoqannginnissaa, issittoq pillugu Greenpeace-mit oqaaseqartartua Jon Burgwald oqarpoq, ilanngullugulu oqaatigalu nunami aatsitassat piaarnissaat Kalaallit Nunaanni aallunneqarnerusariaqartoq.
Immap naqqani misileraalluni uuliasiornermiit ukiut 15-20-it qaangiunneranni aatsaat uuliamik qalluisoqalersinnaasarpoq, nunami aatsitassanik nassaarnermit piffissaq sivikinnerusoq ingerlareeraangat qalluineq aallartittartoq.
- Qularutissaanngilaq aatsitassat Kalaallit Nunaata isertitaqarfigisinnaagai aammalu aningaasat inuiaqatigiinni iluaqutaassaqisut. Tamannali avatangiisit mianeralugit pisariaqarpoq taamaammat kalaallit politikkerit kajumissaarumavakka aatsitassat samminerussagaat uulia pivallaarnagu. Taamaasilluni pinngortitarsuaq kusanartoq pigiinnarneqarsinnaavoq tassangalu peqatigitillugu aningaasarsiorluni, Jon Burgwald naggasiivoq.
