Greenpeace immami itisuumi qillerinernut inerteqquteqaqqusivoq

Europami naalakkersuisunit assigiinngitsuneersut 15-it Ospar-kommissionimi, tassa Atlantikup avannaata kangiani immamik isumaginnittut, septembarimi ataatsimiilerpata, nunani assigiinngitsuni naalakkersuisut, immani itisuuni uuliasiorluni gassisiorlunilu qillerinissanut inerteqquteqarnissamik aalajangiisariaqarput. Taamami pisoqanngippat issittup imartaa Mexicop kangerliumanersuani ajutoornertut ittumit eqqugaariaannaammat.

Ospar-kommissionip Bergenimi septembarip 20-anniit 24-annut ataatsimiinnissaa sioqqullugu Greenpeace, Danmarkimi avatangiisinut ministerimut Karen Ellemannimut allakkatigut taama kajumissaaripput.

Nunatta Kitaata avataani uuliamik ujaasilluni qillerinerit Greenpeacep unitsikkusuppai. Mexicop Kangerliumanersuani uuliasiorluni qillerivimmi ajutoornermi ajoqusiinerit ernumaammersitsisuusut, Greenpeace isumaqarpoq.

- Nunarsuatsinni sumiiffimmi allami, piffissamilu allami, assersuutigalugu Issittup imartaani taamatut ajutoortoqaraluarpat, annertunerujussuarmik sivisunerujussuarmillu sunniusimasumik pisoqarsinnaavoq. Tamatuma peqatigisaanik uuliap maqisup sapuserlugu killilersimaarnissaa maqineratalu milinniarnissaa ajornakusoornerujussuusussaavoq, Mads Flarup Christensen Greenpeace Nordenimi pisortaq, Karen Ellemannimut allakkamini taama allappoq.

Taassuma innersuussutigaa, ministerit 15-it taakkua Ospar-imi peqataasut, nunat imartallu illersorneqartut pillugit attaveqaqatigiiffimmik pilersitsinissaq 2003-mi isumaqatigiissutigereermassuk.