Greenpeace iliuuseqarpoq
Avatangiisinik illersuiniaqatigiiffimmit Greenpeace-meersut gummibådit arfinillit 35-nik inuttallit ullaarmanna umiarsuup Atlantic Osprey-ip Stockholmip kujataani illoqarfimmut Studsvikimut tulanniarnerani akornusersuipput.
Umiarsuaq nukissiorfiup atomitortup eqqagassartaanik aallersuuvoq Danmarkillu imartaatigoorluni eqqagassat Tuluit Nunaanni atomit igitassartaannik suliaqartartumut tusaamanerlugaaqisumut Sellafieldimut ingerlattussallugit.
Nunani Avannarlermiut Greenpeacemeersut danskinik marlunnik ilaqarput, aappaalu sisamanik allanik ilaqarluni tigusarineqarsimavoq, tamanna pivoq gummibådit atorlugit umiarsuarmik akornusersuinialeruttorneranni, taama nalunaarpoq Greenpeacemit tusagassiorfinnut oqaaseqartitaq, Christina Koll, Sverigimi iliuuseqarnermi peqataasoq.
- Isumaqarpugut igitassat taama ulorianartigisut imaatigut angallanneqartariaqanngitsut, tassami aniasoqarnissaa ulorianaateqarmat, aammali peqqarniisaarnianit saassunneqarsinnaammat, Christina Koll oqarpoq.
Greenpeaace aamma isumaqarpoq igitassat Sellafieldimi suliareqqinneqartarnerat naammaginartumik isumannaatsuunngitsoq.
Umiarsuup Atlantic Ospreyip atomimit igitassat 5 tonsiusut Sverigep nukissiorfittut misileraaffianit annerpaamit R1-imit angallattussaavai. Pilersaarutit naapertorlugit umiarsuaq tallimanngorpat Sverigimit aallartussaavoq.
Umiarsuaq Sverigimi Studsvikimut tikitsinnagu Greenpeacermiut unitsitsiniarlutik misileeqqinniartut oqaatigineqarpoq.
