Greenpeace Kalaallit Nunaanniinnaq kamannermik pilersitsinngilaq. Sjællandip avannaani Gillelejemi aalisartut pinngortitamik illersuiniaqatigiiffik 'innimiillisaarluni' isersimasutut politiinut nalunaarutigaat, tassami taakkua aalisariutaanni Greenpeace GPS-ikkut nassitsissutinik ikkussuisimammat.
Ilanngutassiaq:
Politiit suliassaq innimiillisaarluni unioqqutitsillunilu isernertut paasiniaaffigaat, taama oqaluttuarpoq politikommissær Kjeld Olesen Sjællandip avannaani politiineersoq.
- Tamanna pillaasarneq pillugu inatsimmi paragraf 264-imik unioqqutitsineruvoq, tamatumani imaaliallaannaq tikinneqarneq ajortuni innimiillisaarluni iserneq pineqarmat, pisumilu matumani tassa aalisartut aalisariutaat iserfigineqarsimallutik.
Greenpeacemiit oqaatigineqaraluartoq suliniaqatigiiffik tassaasoq GPS-ikkut nassitsissutinik ilioraasimasoq, tamatumani nassuernerinnaq pineqanngitsoq politikommissæri oqarpoq.
- Taava paasiniagassarilerparput innimiillisaarluni unioqqutitsillunilu isernermi inuit kikkuunersut, tassami suliniaqatigiiffimmik ujarlersinnaannginnatta, politikommissæri oqarpoq.
Politiit ullumi ullup ingerlanerani Danmarkimi aalisarnermut pisortaqarfik attaveqarfigissavaat apersuutigalugulu GPS-ikkut nassitsissutit unioqqutitsilluni aalisartoqarnissaani uppernarsaatissatut atorneqartussaasimanersut. Aalisarnermut pisortaqarfik Greenpeacemit atortussanik ualimut nassinneqassaaq.
Sjællandip avannaani aalisarneq inerteqqutaalluinnarpoq, tamanna Kattegattip saarulliinik taaneqartartut suffiffigisarmassuk. Alapernaarsuinermi paasineqarpoq aalisariutit tamaani inerteqquteqarfiusumi 70-eriarlutik angalasarsimasut.