Greenpeace arlaatigut iliornialissappat politiinit sillimaffigineqarpoq

Uuliasiornermi qillerivissuaq Leiv Eiriksson Nuup Kangerluata paavaniippoq, ullullu kingulliit marluk Greenpeacep umiarsuinit marlunngit sakkutuullu nakkutilliissutaaniit Vædderenimit ingiallorneqarsimavoq, maannalu angallatit nakkutilliisut marlunnik ilapput.

Pineqartut tassaapput politiit angallataat marluk nakkutilliisussat aammalu pinerluttoqannginnissaanik qulakkeerisussat.

- Nassuerutigisariaqarparput Greenpeacep Kalaallit Nunaanniittarnera misilittagaqarfigineqarmat. Kingullermik maaniimmata pinerluttoqarpoq tamannalu pinaveersimatinniarparput, vicepolitimester Morten Nielsen KNRimut oqarpoq..

Suliassaq tamanna Vædderenip ingerlattussaaanngilaa pinerluttoqassappammi politiit tamanna suliassaraat.

Morten Nielsenip erseqqissarpaa politiit akuliuteriaannaasut, taamaattorli oqaatigiumanngilaa sorpiaat pisinnaanerat piareersimaffigineqarnersoq.

- Takorloorsinnaavarput Greenpeace assigiinngitsutigut iliuuseqarniarsinnaasoq tamannalu piareersimaffigaarput, Morten Nielsen oqarpoq.

Siorna Greenpeacep helikopteria politiit arsaarinnissutigaat, Qeqertarsuarmut mimmat Qeqertarsuup avataani iliuuseqarnermi atorneqareersoq.

Aatsitassat pillugit pisortaqarfimmit Jørgen Skov Nielsen KNRimut ilisimatitsivoq Leiv Eiriksson Nuup eqqaanniissasoq ullualunni peqqumaasiviit immersussallugit.

Greenpeacep umiarsuani Esperanzami tusagassiisartoq Sune Scheller KNRimut oqarpoq, umiarsuartik orsussaqarluni taquaqartoq qaammatini arlalinni angalanissamut naammattunik.