Per Stig, arferup neqaa qillertuusani pisalissagatsigu?, taama aperaat illersuiniaqatigiiffiup Greenpeacep- Christiansborgimi ullumi Danmarkip nalunaaqutaa malillugu aqqarnup qeqqanut akerliussutsimik takutitsisui.
Nappartarsuit arfineq-pingasut ”Whales Canned Thanks to Danish Support”. "Danmarkip illersugaanik arferup neqai qillertuusani pineqarsinnaalerput"-mik nutserneqarsinnaasumik allagartarsualersorneqarsimapput. Qillertuusaaqqat assinganik allassimasut inunnut sanioqquasunut - nunanut allanut ministerip Per Stig Møllerip assinganik kiinarpalersorsimasunit aamma agguaanneqarput.
Arfanniarneq pillugu ataatsimiititaliarsuup IWC-p Anchoragemi Alaskamiittumi maajip ulluisa 28-anniit 31-anut ataatsimeersuarnissaanut atatillugu akerliussutsimik takutitsineruvoq. IWC-mi Danmarki aallartitaqartarpoq, ukiormannalu qulequttat ilagaat arferit imartamik eqqissisimatinneqarfissaanik peqalissanersoq. Aamma ilisimatusaatigalugu arfanniarneq ukiumullu tullermut arfattassiissutissat oqaluuserisassat ilagaat.
