Greenpeace akerlerineqarpallaarunnaarsorivoq
Ulluni makkunani Nunatsinni oqallisaanerpaat ilaginnguatsiarpaat, Greenpeacep Cairn Energyp qillerutaanik Leiv Eirikssonimik malersuinera.
Qillerussuup ingerlaarnini Nuup avataani maanna unitsillatsiarpaa qilleriffissaminut, Lady Franklinimit taasamut David Strædemiittumut ingerlaqqinnginnermini.
Tamannalu iluatsillugu nutaarsiassani oqallisaaqisoq, umiarsuaq Esperanza Radioavisimit ornipparput tassani inuttaasut oqaloqatiginiarlugit.
- Maannakkut Nuup avatingaatsiarsuaniippugut 12 sømilitut avasitsigisumiilluta. Qillerussuaq Leiv Eiriksson, angisoorujussuuvoq immamiit qummut 30 meterisut portutigigunarluni. Massakkut Greenpeacep umiarsuuaanut Esperanzamut ingerlaaraluarput, taannali isaannatsinnik maanngaanniit takusinnaanngilarput, aammami malleqimmat, suleqaterput Apollo Jeremiassen paasissutissiivoq.
Kangerup avataani imaq, Cairn Energyp aamma Greenpeacep akersuuffiannik taaneqarsinnaasoq tikitarput mallersukasiuvoq, tamaanngaanniillu 12 sømilitut avasitsigaluni Esperanza ippoq tikinneqarsinnaanngiusalluni. Taamaattumik Nuummut utiinnariarluta Esperanzami inuttat ilaat, Sune Scheller oqarasuaatikkut oqaloqatigaarput:
- Maani uninnganitsinni susassaaleqinngikkaluarpugut, kisianni aamma uninngatilluta piareersimanerput annikillisarparput, Greenpeacep avammut tusagassiinermut sulisuisa ilaat, Sune Scheller oqarpoq, nangillunilu oqaluttuaralugu unnummut nerereerunik nerrivimmi arsaarartoqassasoq.
Naak maannakkorpiaq angallat Esperanza uninngaannaraluartoq inuttaasa maannamut angusimasatik nuannarutigaat:
- Nuannaarutigalugu oqaatigisinnaavara, ajornartorsiutaasinnaasut pillugit Greenpeacep aammalu avatangiisinik illersuiniaqatigiit allat maanna angusimammassuk inuiaqatigiinni oqallisilerneq. Tamannalu siuariarneruvoq nuannaarutigineqartariaqartoq, Sune Scheller oqarpoq.
Greenpeacep piniartunut sunniutigisimasaat eqqarsaatigalugit Nunatsinni innuttaasunit amerlanernit illersuiniaqatigiit nuannarineqanngitsulipilussuupput, taamaakkaluartoq maannakkut angusaat iliuusaallu eqqarsaatigalugit qangamut naleqqiullugit akuersaarneqarnerugunarlutik:
- Greenpeace Kalaallinit iluarineqanngitsunik qanga suliaqarsimavoq aammalu uanga nammineerlunga qanga iliuuserisimasaat nuannarinngilakka. Maannali Greenpeacep iliuusai allarluinnaapput, takusinnaanngilaralu maanna ajortitsiniaasoqarnera, Sune Scheller oqarpoq.
Greenpeacep qanittukkut oqariartuutigaa, Nunatsinni innuttaasut qanimut naapeqatigisalerniarlugit. Aamma iliuuserisassatik allanngortilluinnarniarlugit oqaatigaat, tamannali imartatsinni suliniutaat eqqarsaatigalugit qanoq paasineqassava?
- Maanna sulinerput eqqarsaatigalugu immitsinnut isornartorsiortuarpugut, tassami avatangiisit qanoq illersorluarsinnaatiginerlutigit aammalu sulinerput qanoq pitsanngortissinnaatiginerlutigu oqaloqatigiissutigiuarparput. Unali naatsorsuutigineqarsinnaavoq, Cairn Energy Kalaallit Nunaata imartaaniitillugu soorunami malinnaajuassuugut, tassami umiarsuarmi Esperanzami inuttat tamannarpiaq siunertaraat, Sune Scheller oqarpoq.
Greenpeacep malugisimavaa Nunatsinni innuttaasut amerlanerit qanoq iliuusiminnut malinnaanerulersimasut, taamaakkaluartorli Greenpeacermiut imminnut isornartorsiortuarput:
- Uuliasiortoqarnerani ajutoorsinnaaneq eqqarsaatigalugu sillimaniarnermut tunngasunik isumannaallisaanissanik pitsaasunik suli takusaqanngilagut, tamannaannarluunniit pissutigalugu uagut isumaqarpugut Kalaallit Nunaata sineriaani uuliamik qalluisoqassanngitsoq, Greenpeacep avammut tusagassiisartua, Sune Scheller oqarpoq.
