Greenpeace aallaqqippoq akerliunertilli unitsinnianngilaat
Avatangiisinik illersuiniaqatigiit Greenpeacep generalsekretæria Kumi Naidoo Cairn Energyp uuliamik qillerivianut Leiv Eirkssonimut tallimangormat ullaakkut qaqivoq. Pisut nalaani Greenpeacemi suleqataasoq arnaq malinnaasimavoq. Arnap oqaluttuaraa, Cairn Energyp isumannaallisaanermut piareersimatitsinera pillugu pilersaarutinik Kumi Naidoo piumasaqartoq.
Kisianni tassa piumasaqarnera iluatsinngilaq, Kumi Naidoo malittaalu, nalunaaquttap akunnera ataaseq inorlugu, uuliasiorfimmeereersullu, politiinit tigusarineqaramik Nuummukaanneqarlutillu.
Kumi Naidoop malittaasalu politiinit tigusarineqarnerata kingorna Greenpeacemit nalunaarutigineqarpoq, Greenpeacekkut umiarsuaasa Esperanzap aamma Arctic Sunrisep Kalaallit Nunaata imartaa qimakkaat.
Illersuiniaqatigiit nalunaarutigisaat malillugit, umiarsuaq Esperanza maanna Canadap tungaanut ingerlaartoq, Arctic Sunrise Europap tungaanut ingerlaarpoq. Tamannalu Kangilinnguani sakkutooqarfimmit uppernarsarneqarpoq.
Avatangiisinik illersuiniatigiit sapaatip akunneri arlaqartuni Cairn Energyp umiarsuaata qilleriviusup Leiv Eirikssonip eqqaaneereerlutik pingasoriarlutillu qillerivimmut qalloraluarlutik, qillerinerit unitsinngilaat. Aamma isumannaallisaanermut pilersaarutip pisortatigoortumik saqqummiunneqarnissaanut piumasaqaataat tusaaneqanngilaq. Taamaakkaluartoq issittumi uuliamik qillerinerit unitsinneqarnissaannut suliniaqatigiiffiup suliniuteqarnini unitsinniarnagu nalunaareerpoq.
Cairn Energy issittumi uuliasiornermigut issittumi pinngortitamik uloriartorsiortitsisinnaavoq, pinngortitami najugaqartut inuuniarnerminni pinngitsoorsinnaanngisaat aamma uumasut issittumiittut ulorianartorsiortinneqarsinnaallutik. Greenpeacellu eqqumaffiginiaqquaa.
- Issittumi imaannaangitsumik atugaqarfisumi uuliamik maqisoortoqarpat ajortorujussuarmik kinguneqarsinnaavoq, mingutsitsisoqarpallu saliisinnaanissap iluatsissinnaanissaa imaannaanngitsussaaq, Greenpeacemi avatangiisit pillugit suleqataasoq Jon Burgwald oqarpoq.
Avatangiisinut illersuiniaqatigiit akornusersuillutik pissusilersornerat Naalakkersuisuinit qatsunneqalersoq, Inuussutissarsiornermut Aatsitassarsiornermullu Naalakkersuisoq Ove Karl Berthelsen Qanoruumi apersorneqarluni ippassaq oqarpoq.
Pisut allaavigalugit, Ove Karl Berthelsen danskit naalakkersuisuinik oqaloqateqarpoq, avatangiisinik illersuiniaqatigiit Greenpeace sakkortunerusunik pineqaatissinneqartarnissaat oqaloqatigiissutigalugu.
Greenpeace tikilluaqqusaanngitsutut inissisimalernissaanik danskit naalakkersuisuinut noqqaassuteqarnissamik pilersaaruteqarpugut, Ove Karl Berthelsen oqarpoq.
Naalakkersuisut danskit naalakkersuisuinut noqqaassutaat akuerineqarpat, Greenpeace Kalaallit Nunaata imartaani 200 sømil killigititaq qaangerpassuk, danskit sakkutuuisa imarsiortuinit tigusarineqarsinnaalissapput - killigititaq qaangerunikku maleruaqqusanik unioqqutitsissagamik.
